Curacao: Manera a keda anunsiá resientemente polis ta intensifiká su kòntròl pa kombatí kriminalidat en general i posishon di arma di kandela ilegal en partikular. Tur dia tin kòntròlnan dirigí na diferente sitio na Kòrsou. Den kuadro di esaki, djadumingu 26 di mart 2017, alrededor di 11.30 or, un unidat di polis atento a nota un outo ku glas skur ku tabata stashoná riba Kaya Kazerne. E polisnan a bai direkshon di e outo aki pa bai hasi un kòntròl. Na e momento ei un hòmber a sali for di e outo i kuminsá kana bai i despues a saka kareda kore bai. E hòmber sospechoso aki tabatin un tas di barika pretu huntu kuné. E polisnan a persiguí e hòmber aki na pia i a bin detené alrededor di 10.40’or den Kaya Militar. Mesora nan a nota ku e no tin e tas pretu mas huntu kuné. Despues di un investigashon breve nan a topa ku e tas pretu den kurá di un kas na Kaya Kazerne ku ta riba e ruta ku e sospechoso a kore durante su huida. Den e tas polis a haña i konfiská un pistol i tambe sedulá i reibeweis di e sospechoso i un pòtmòni.
E sospechoso aki J.I.U.A., nasé na Kòrsou 20 aña di edat a keda detené komo sospechoso pa violashon di Lei di Arma di Kandela.
A presentá e sospechoso dilanti di un Fiskal ouksiliar ku a ordená su enkarselamentu
pendiente di mas investigashon.