Mas cu 80 morto pa explosion di tanki di oxigeno den un hospital na Irak

Al menos 82 persona a fayece y 110 a resulta herida den un explosion y candela cu a surgi despuues diadomingo marduga den un hospital pa pashentnan di COVID-19 na Baghdad, asina Ministerio di Interior Iraki a duna di conoce.

“E balans ta di 82 morto y 110 herido di diferente indole, e vocero di e ministerio, Jaled al Mhana, a bisa den declaracion na e planta di television Iraki.

Al Mhana a indica cu algun di e victimanan a sufri kemaduranan y otronan a bula for di pisonan halto pa huy for di e vlamnan, causa pa e explosion di tankinan di oxigeno den e hospital AL Jatib, na zuidoost di e capital. E cantidad di fayecidonan por aumenta debi na gravedad di e lesionnan di algun di e heridonan.

Mesora a cuminsa investiga e causanan di e explosion. Prome Minister di Irak Mustafa Kazemi, a pidi resultado den 24 ora di tempo y a papia di un negligencia “criminal”, mientras cu e presidente di e pais, Barham Saleh, a culpa e siniestro na “destruccion acumula di e institucionnan estatal door  di corupcion y mal maneho”.

Den un grabacion di un camara di siguridad di e hospital, por mira un grupo di persona papiando, den gang dilanti e sala unda e explosion a tuma luga, rond di 10.20 di diasabra anochi.

Ministerio di Interior a descarta cu e hecho por tabata algo intencional y e prome hipotesis riba e causa di e tragedia ta papia di un kortsluiting cu a causa e explosion.

Pa aworaki, e retira e director di e hospital y hefe di mantencion, mientras cu Corte di Rusafa, e region na cual e centro di salud ta pertenece, a decreta aresto di e director mientras cu investigacion ta andando.

Gobierno tambe a dicidi, durante reunion di Conseho di Ministro, pa suspende di forma temporal e Ministro di Salud, Hasan al Tamimi, Gobernador di Baghdad Mohammed Jaber al Ata y Director General di Departamento di Saluddi e region di Rusafa, Abdelghani al Saadi.

Comments

comments