Diaranson riba un rueda di prensa, DIMAS a comparti algun informacion den cuadro cu regreso boluntario, un programa di asistencia cu ta brinda ayudo na e personanan cu ta encontra nan mes na Aruba cu un status legal, of cu a keda atras cu un status iregular, of esnan cu ta turista cu a keda pega na Aruba y cu ta desea di regresa nan pais di origen bek.
DIMAS ta informa cu e ayudo humanitario cu nan ta brindando ta e dunamento di informacion, tuma registracion di cuanto persona pa cua parti di mundo ta desea pa regresa, y ta yuda nan a base di e palabracionnan diplomatico entre paisnan di origen y Aruba. Tambe pa locual ta areglo logistico pa regla e vuelonan pa e personanan por regresa nan pais bek. Marilyn Wout, vocero na DIMAS ta bisa cu e vuelonan aki no ta wordo ofreci a base gratuita. DIMAS no ta cobra pa e deliberacionnan y otro esfuersonan cu mester bay aden, pero si locual ta e gasto cu e persona cu mester cubri ta su pasashi.
https://www.facebook.com/masnoticia/videos/375558340152420/
“Bo mester corda cu durante e pandemia aki tin hopi frontera sera, p’esey tambe esakinan ta vuelonan humanitario”, sra. Wout ta splica. E deliberacionnan riba nivel diplomatico mester wordo haci cu e pais di origen, y ora DIMAS ta regla e vuelonan, e personanan ta cubri nan asiento den e vuelo; DIMAS ta charter e vuelo y prijs di ticket ta wordo dividi den cantidad di persona, dus e persona ta paga e ticket, e ta paga e COVID19 test, y e ta paga e Airport Tax.
Desde April cu a lansa e proyecto aki di regreso boluntario, DIMAS a haya un cantidad grandi di personanan cu a registra pa e asistencia aki. Vuelonan a bay pa Europa, Argentina, Colombia, Republica Dominicana, Guyana, varios parti di mundo caminda e frontera tabata sera. Tabata tin vuelo pa Venezuela tambe pero door di deliberacionnan cu mester a tuma luga, esakinan no a tuma luga na Mei, pero si a logra danki na embahada na Venezuela, consulado na Aruba y diferente instancia cu a aporta pa dos vuelo exitoso pa Venezuela. Tin planea tentativamente na final di October pa e di tres vuelo tuma luga. No tin fecha buta pasobra ta den deliberacion y planificacion.
Tin mas di 600 persona cu a registra pa bay bek Venezuela. DIMAS ta subraya cu mester pone den perspectiva cu no por aborda 600 persona den un solo vuelo of dos, ni tres, pero esaki lo bay cu esfuersonan mutuo y pasenshi, por logra pa tur persona repatria.
Esnan cu kier bolbe nan pais mester registra nan mes online riba pagina di DIMAS den seccion di Repatriacion Voluntario:
https://www.123formbuilder.com/form-5383301/form
DIMAS tin un lista basta largo di hende pa procesa, ta pidi pa por fabor tin poco mas pasenshi mientras nan ta purba yega na tur hende, comunicando cu nan na momento cu tin vuelo confirma.