E prome conferencia Caribense riba crímen cibernetico (Caribbean Cybercrime Conference) a resulta un exito rotundo. E conferencia a tuma luga awe 16 di Novèmber 2016 den Renaissance Hotel na Aruba y a keda organisa pa oficina di Procurador-General di Corsou, Sint Maarten y islanan BES hunto cu Recherche Samenwerkingsteam (RST).
Apertura di e conferencia tabata den man di director di e team forensico di DataExpert, André Hakkers, siguí pa un palabra di bon biní di hefe di RST, Martine Vis. Na nomber di Procurador-General pa Corsou, Sint Maarten, y islanan BES, Guus Schram a hiba palabra Fiscal Mayo di Sint Maarten, sr. Ton Maan.
Entre e oradonan sr. Lodewijk van Zwieten kende ta fiscal nombra como experto nacional na EuroJust encarga cu crimen cibernetico. E tabata e orado principal, cu su presentacion titula “Bedreigingen en uitdagingen op het gebied van cybercrime en cybersecurity”. A continua cu sesionnan informativo tokante crimen cibernetico y investigacion digital forensico. Esnan encarga cu e sesion informativo tabata entre otro Nick Drehel (Access Data), Craig Guymo (Magnet Forensics), Bob Elder (Teel Technologies Canada), Michael Stout, Eric Boerboom (RST), Matthew Cook (Amped Software), Kevin Thomas (Fernico) y Chris Stippich (Digital Intelligence).
Clausura di e conferencia tabata den man di Michael Stout, consulent y entrenado riba tereno di siguridad di informacion, cu e discurso final titula “Demystifying the Dark Web”.
Meta di e Caribbean Cybercrime Conference tabata na prome luga pa crea concientisacion pa e problema creciente di crímen cibernetico y e necesidad pa haci mas investigacionnan digital. E meta ta tambe tabata pa splica kico investigacion digital forensico y crímen cibernetico ta encera.
Mas cu 130 persona a participa awe na e conferencia. Entre nan representantenan di Gobierno, husticia, cuerponan di polis di Aruba, Sint Maarten y Corsou, y tambe representantenan di companianan priva y gubernamental den Caribe.