Luna di October ta mundialmente conoci como e luna di conscientisacion di cancer na pecho. Tur aña Mary Joan Foundation ta habri e luna cu un santo sacrificio di misa y ta celebra e misa aki cada aña den un bario diferente. E aña aki ta na Kapel di Alto Vista ariba diasabra dia 1 di October pa 6’or di atardi. Prome cu e santo sacrificio di misa lo tin un rosario cu lo cuminsa pa 5:30 di atardi.
E misa ta pa conmemora tur cu ta wordo confronta cu cancer na pecho, tur esnan cu ta pasando den e momentonan aki door di tratamento y pa duna honor y respet na tur cu a bay laga nos. E enfasis ta pa comunidad di Aruba bira consciente cu e malesa aki no tin distincion y pa keda educa bo mes ariba e risiconan y biba un bida mas saludabel. Damanan cu ta experiencia tratamento nan di cancer, no solamente ta sinti e efecto fisico, pero emocionalmente y spiritualmente tambe. Como un pashent e meta principal ta pa sobrevivi, tin un bon calidad di bida y renoba e ser. Ta importante pa recobra forsa, e confiansa, e curashi pa vence cualkier obstaculo cu pasa den e caminda. Confrontando e malestar y determina pa lucha y gana lo laga cada persona realisa con fuerte nan ta. Abo ta mas fuerte cu e malestar di cancer, pues ariba e dia aki, ban refleha hunto y despues continua cu e bataya.
Tur persona cu bini na e Santo Sacrificio ta haya un cinta roos pa nan bisti henter luna di October. E cinta roos aki ta e simbolo di apoyo pa e lucha contra cancer na pecho. Pa mas informacion yama Mary Joan Foundation Sabana Blanco 8, Oranjestad, Aruba Tel: +297-588-9999 Cel: +297-594-0919 E-mail: [email protected]