Mary Joan Foundation (MJF) cu e exposicion, ‘Explore our story through art’ totalmente exitoso

Diasabra 27 di Augustus Fundacion Mary Joan tabata den ambiente di arte! Mary Joan Foundation hunto cu Cede Aruba den e proyecto di Feria Social 2016 ta sumamente orguyoso di e confiansa brinda na nos fundacion. MJF tabata tin e honor di tin un hoben adulto hopi talentoso y apasiona pa yuda su prohimo den nos team, esta Catalina Becerra, nos Youth Coach. Pa lunanan largo Catalina y su team di boluntario organisatorio; Janimare Tromp, Jo Ann Kock, Josette Tejeda, Dessline Loefstok y Kimberly de Cuba a traha duro pa asina realisa un exposicion di arte. Durante lunanan tabata tin diferente workshops brinda na clientenan y survivors di MJF y algun sigur tabata presente ta ilustrando nan pensamento, sentimento y talentonan scondi den creacion di arte.
Durante e anochi MJF tabata tin e honor di tin artistanan local, Charles Timothy, Ronald Lemminga, Sheila Werleman, Naomi Landgraf y Sandra van der Linden cu a pone nan arte pa cada bishitante por admira of cumpra. Kids & Youth in Action a haci un show hopi bunita sin conta cu Sra. Belen Kock-Marchena a declama nos cu un bunita poesia y un cancion presenta por medio di Sra Lydia Emerencia. Un anochi yena di arte no por a falta e arte di poesia. Pa e anochi e poetanan acompañante Beach Lama cu su declamacion impactante y Leonardo Philips a capta tur nos atencion y cende un luz di inspiracion y conscientacion. oeta Yakari lamentabelmente no por a ta presente pero su poesia poderoso si a capta hopi pensamentonan den voz di Leonardo.
Musica no por a keda afo, tabata tin un variacion pa cada gusto. Megateca Genie a lanta animo na nos centro. Tipico Palisia a deleita nos cu nan dushi musica crioyo. Sr. Tino Ruiz a serena nos artesanonan local cu su Mandolin. Sr Eltienne Yarzagaray a trece un ambiente glorioso y di reflexion. Un anochi totalmente fabuloso! Muchanan a hunga bay goal den e kids corner y pa tur cu a pasa ne cushina y bar por a keda bariga yen y contento te na final!
MJF ta reconoce e importancia di tin hoben y hoben adulto activo den e sector social. Esaki ta brinda nos pa tin futuro lidernan cu e capacidad pa yuda nos comunidad. Mary Joan pa extende su gratitud maximo na cada sponsor y boluntario pa nan ayudo y apoyo generoso. Na tur cliente of sobreviviente, danki pa e confiansa! Cada un di bo(so) ta un Tesoro pa nos fundacion.

Comments

comments