Danki na e hecho cu minister Mike de Meza nunca a perde e speransa cu lo por a habri e refineria back, awe nos ta celebra e hecho cu Aruba tin su propio refineria. E apertura di refineria no ta nada otro cu e resultado di confiansa den nos propio hendenan y insistencia di gabinete Mike Eman II pa habri e refineria y garantisa trabou pa nos hendenan! Y mas cu tur cos garantisa e di dos pilar economico di nos pais bek, aki nos ta papia di no menos cu 10 pa 12% di nos GDP, cu ta representa entre 100 pa 120 miyon florin den caha di Gobierno, tambe ta importante pa bisa cu ora nos ta papia di trabou nos ta papia di 1000 cupo di trabou directo y 4000 indirecto, aki nos ta papia di prosperidad pa Aruba henter.
Mi ta conteto di mira cu Oposicion a reacciona na tempo y a vota pro e ley, despues cu nan a papia hopi, y grita hopi toch nan a bin realisa kico ta bon pa Aruba. Ainda ta fresco den nos mente cu nan a laga sa cu nan tin shete compania cu kier habri e refineria, pero ora “puntje komt bij paaltje” ni un di e companianan a presenta, es mas Parlamentario Andin Bikker di partido Democracia Real a yama reunion dos biaha pa compaña nan cu lo tabata interesa pa habri e refineria pero e compaña nan aki a meldziek te awe no a tende nada mas di nan.
Minister Mike de Meza si a persevera, no cu palabra y grito, pero cu trabou duro y confiansa den nos propio expertonan cu a negocia e apertura. Awe e integrantenan di MEP kier bin uza dichonan manera “si tin di 1% posibilidad pa habri e refineria mester sondia esaki” e mes un intergrantenan aki a haya e mesun 1% aki dia 29 di Mei 2010 y nan a vota contra e reapertura di e refineria esey ta e realida, e lider Evelyn Wever-Croes e tempo ey a prefera di bay fiesta y keda sin vota pa e ley aki. Tristo pa Bo mira e tipo di hendenan aki kier bin hunga salvado di mundo pero ora nan tabata tin e oportunidad pa salva e refineria a keda sin vota y otro nana riba su partido a vota contra, nan lo bay den historia pa esaki, y sigur e fraccion di AVP lo bay den historia pa e hecho cu na dos occacion a mustra determinacion y a haci tur loke tabata den nan alcance pa garantisa e reapertura di e refineria.