Debi na abandono, edificio y scolnan di Gobierno ta birando un problema cu adictonan ambulante. Riba esaki, director di DOW, Marlon Croes a splica cu edificionan di Gobierno tin diferente y tambe diferente scol cu a cay den un estado malo di mantencion, pero tambe door cu a bandona e edificionan aki den nan funcion original ta bay haya cu otro tipo di hende ta bay haci uzo di nan. Por a ripara cu na Colegio Frere Bonifacius y Reina Beatrix, Juliana School, esaki ta tumando luga y mas otro caminda tambe. Pero den e caso aki por ehempel un Rosa College, cu Maria Convent, tin trabao ta sosodiendo eynan y e ora ey ta percura pa protehe e edificio cu tin cu ta di Gobierno. A cera tur bentana y porta cu plywood y si e ta causa cu ainda e ta bira un posibilidad cu nan ta bay drenta kita e plywoodnan, lo cer’e cu bloki pa e ora ey evita cu nan por drenta. Esey ta loke a bin ta haci den e ultimo temponan. Pero un biaha mas, e decisionnan ta wordo tuma ki ora e edificio ta wordo drecha y ora tin fondo disponibel pa determina si ta cer’e si of no.
Tin un structura. Basicamente tur edificio di Gobierno ta cay bao di maneho di DIP. DOW tin un rol mas ondersteunend den esey. Pa loke ta trata scol tin basta reunion intensivo cu Ministerio di Enseñansa. A base di esey ta haya señalnan y ta tene cuenta cun’e.
Croes a sigui splica cu semper ta costa placa pa mantencion y ora cu yega fin di aña e placa cu bo tin ta bira hopi menos y tin cu bay draai cu e scarsedad cu tin y ta pone prioridad. A ripara cu por ehempel na Scol Reina Beatrix nan a ontruim e scol. Na Colegio Frere Bonifacius tambe. Lo bay haci un inventarisacion si mester por yuda, duna conseho na Ministerio y pa nan wak si nan tin e suma disponibel pa por haci trabao na nan.