Marlin SEPPA: FMAA tin hopi problema cu pa basta aña no a haya atencion

Diabierna atardi, Sindicato SEPPA a tene un Rueda di Prensa na Centro Colorado Fundacion pa Maneho di Adiccion di Aruba (FMAA), hunto cu e trahadornan kendenan ya for di aña pasa a pidi un reunion cu e Minister pa pone na conocemento di e Minister tur nan preocupacionnan y tur loke ta pasando cu nan na pia di trabou.

Señor Edmundo Marlin di SEPPA a indica varios problemanan cu e trahadornan ta enfrenta na pia di trabou. E mal maneho cu tin den FMAA ta un di e problemanan cu e trahadornan tin. Y esaki ta locual cu nan kier a trece na atencion di e Minister pa asina e Minister comprende cu tin cosnan cu mester wordo drecha pa e trahadornan.

Otro puntonan cu nan tawata kier a yega na oido di e Minister ta e mal estado di e edificio cu ta haci dificil pa e trahadornan desplega nan trabou apropiadamente y e falta di material ta un otro problema cu ta e stroba nan di cumpli cu nan trabou. Hopi di e trahadornan a indica na e Minister cu ta for di nan propio saco nan ta saca placa pa cumpra material y asina duna servicio na e cliente.

Falta di personal tambe ta un problema den FMA cu tambe ta impede pa duna un bon servicio. Tambe e trahadornan a duna di conoce cu pa basta tempo nan ta traha sin haya cursonan pa pone nan mes na altura di cambionan pa nan ta up to date na e problematica di adiccion.

Actualmente tin Centro Colorado tin mas o menos 20 adicto di cual 8 sigur ta hopi problematico. Y tin tres warda cu ta wordo cubri pa un solo trahado pa cada warda.

Minister encarga cu Salubridad, Dangui Oduber a duna di conoce cu e lo bay haci su maximo esfuerso pa atende e problema aki mas pronto posibel. SEPPA a pone na atencion di e Minister cu no solamenta e mester papia y haci promesa sino e mester haci su maximo esfuerso pa cumpli tambe pasobra ya e trahadornan ta cansa cu Ministernan ta haci papia y no ta cumpli.

Comments

comments