Recientemente nos Minister di Finansa cu yen di fanfaria a post riba su Facebook, con trempan e ta cu e presupuesto di Pais Aruba pa 2025, y cu asina e ta cumpliendo cu Ley di Contabilidad. Si di berdad e Minister kier cumpli cu e ley aki, e ora e lo mester a entrega tur e cinco (5) cuentanan anual ATRASA di Pais Aruba (jaarrekening) na Parlamento pasobra nan tur ta hopi laat. Como e Minister di Finansa pa shete (7) aña largo e la logra di entrega solamente dos (2) jaarrekening, esunnan di 2017 y 2018. Via un jaarrekening e pueblo por wak unda berdaderamente su placa ta bay!
E maneho financiero di mr. Xiomara Maduro como Minister di Finansa a wordo caracterisa door di ex Secretario di Estado Van Huffelen (den su rapport Beleidsevaluatie Protocollen Aruba-Nederland y carta na Parlamento di Hulanda) como uno ZWAK. Cu esaki e secretario di estado ta indica y estabelece cu e liderazgo di mr. Maduro pa por administra finansa publico a keda deficiente y cu e informacion raporta pa cual Minister Xiomara Maduro ta responsabel, no ta amplio y no ta confiabel tampoco! Lamentablemente e promesa di e Minister pa fortifica e capacidad di su departamento no a wordo cumpli cune tampoco.
