Siman a habri cu mester a trata un reunion cu tabata spera hopi di dje, pero esaki a keda cancela te diabierna awor debi na diferente cos cu a pasa. Presidente di Parlamento, Marisol Lopez-Tromp, a splica con e dia aki a bay.
E reunion aki tabata toca tema di otorgamento di tereno y cambio di destinacion. E minister invita tabata minister Sevinger di Infrastructura y tambe prome minister Mike Evan. E Parlamentarionan mainta, ora cu e reunion mester a cuminsa, no tabata tin un biaha mas suficiente Parlamentario pa cuminsa cu e reunion. Tin mester di cantidad minimo di 11 miembro. Ora cu e reunion mester a cuminsa, tabata tin un cantidad di 6 miembro di reunion di MEP. Algun no por tabata presente. Uno di PDR y di parti di AVP tabata tin 2 miembro. Consecuentemente mirando cu ta 10 miembro di Staten na e momento ey, e ora a constata cu no por a habri e reunion. Pesey a schors e reunion pa un ora despues, cual na e momento ey si tabata tin quorum. E ora por a cuminsa cu e reunion publico aki. El a inicia berdad cu cierto discusion, no solamente pasobra cu no por bisa un quorum, esta un cantidad minimo pa cuminsa e reunion, pero tambe el a cuminsa tiki mas laat, debi cu e tuberia cu loke ta toca e likido cu tin cu bay pa e airconan pa asina e por funciona den e sala, mirando cu no tin bentana, esaki a wordo distrui, nificando cu airco no por a funciona den parlamento dialuna mainta.
Yegamento laat
E punto di yegamento laat, riba discusion riba quorum ta, cu no necesariamento no ta yega na tempo trabao, pero e tin di haber tambe cu e boluntad pa tey presente den sala pa e reunion por cuminsa. Cada miembro di Parlamento tin un responsabilidad pa esaki. Naturalmente tin diferente fraccion den Parlamento, pero con cu bay bin cada parlamentario ta carga un responsabilidad individual di parti esnan cu no solamente a vota pa e partido, pero eyden ta representa henter Aruba, na momento cu bira miembro di Parlamento. Esey ta nifica cu ora cu tabata tin un cantidad minimo di 11 miembro a forma, a habri e reunion. A tuma luga e prome buelta di debate, caminda cu e Parlamentarionan por a haci nan pregunta na e minister presente.
Dialuna a bay practicamente toch, apesar di e calor, casi henter dia cu e reunion y na momento cu tabata bira demasiado calor, e ora a schors pa diabierna merdia, segun Marisol Lopez-Tromp.
Siguridad
Con ta posibel cu tin casonan di kirabmento di cos riba edificio di Parlamento, ta un pregunta cu hopi hende ta haci, pero cual no ta uno straño, mirando cu den historia ya cierto cosnan a sosode. A puntra Marisol Lopez-Tromp si tin siguridad cu ta cuida e edificio.
Pa loke ta Parlamento den e edificio ora cu tin reunion publico ta tuma luga, naturalmente tin presencia di personanan cu ta cuida esnan cu ta presente, pa yuda mantene ordo tambe na entrada y percura pa e lugar ta safe pa un y tur, no solamente pa e politiconan, pero pa e bishitantenan y personal, y esnan na Parlamento durante reunion publico. Tambe sa tin polis presente.
Pero no tin constantemente presencia di KPA den sala of di CEA den sala. E ta mas tanto ora di reunion publico y tin cu bisa pa loke ta e parti di siguridad, tin tambe e parti pafo di e edificio, caminda cu ta trahando riba e aspectonan aki pa aumenta e siguridad mas tanto posibel.
No ta prome biaha cu distruccion. Mas of menos un siman pasa a lanta mainta cu henter Parlamento tabata skirbi cu tur sorto di palabranan dirigi na e amienda entre otro di Parlamentario de Souza-Croes y opinion di cierto personanan riba esaki. A entrega keho pa esaki y pa loke ta camaranan, etc. loke a wordo trata a wordo entrega pa por haci investigacion riba dje. Mesun cos ta conta tambe pa loke ta e destruccion di e tuberianan. Pero por bay mas leu, cu na momento cu esaki sosode tin di nan por ta tin di haber cu kier expresa opinion na un manera door di distrui propiedad of daña propiedad cu ta di pueblo mes. No mester kiboca cu pa por drecha esaki, ta e mesun placa di pagado di belasting ta bay pa esaki. Ta e presupuesto di pais Aruba y presupuesto di Parlamento ta wordo uza pa haci esakinan. Ta te ora cu wak ken ta esun cu a haci’e, por bay na cobra e personanan aki, pone nan paga of boet pa e acto cu nan a haci.