Marisol Lopez-Tromp: “Minister di Husticia mester duna mas informacion riba situacion di asilo”

Marisol Lopez-Tromp, lider di Fraccion di POR den Parlamento den cuadro di e situacion di Venezuela y basa riba un carta cu Secretario di Estado di Relacionnan di Reino, Raymond Knops, a manda pa Tweede Kamer, a haci un serie di pregunta por escrito na Minister di Husticia Andin Bikker.
Den e carta di Raymond Knops el a indica cu lo honra e peticion di gobiernonan di Aruba y Corsow pa duna asistencia tecnico pa loke ta e procedura di asilo pa refugiadonan Venezolano cu lo por huy pa e dos paisnan aki.
Teniendo na cuenta esaki, lider di fraccion di POR a haci e siguiente preguntanan a minister Bikker:
1. Cuanto peticion pa asilo tin registra actualmente?
2. Kico e procedura existente na e momentonan aki pa asilo ta encera?
3. Raymond Knops ta indica den su carta cu e cooperacion cu gobiernonan di Aruba y Corsou den e area di asilo y migracion a intensifica. Minister por splica con esaki a intensifica?
4. Minister di Husticia por splica den detaye con e asistencia temporal di Hulanda pa sector di inmigracion lo ta pa loke ta e areanan di asilo y maneho di peticionnan di asilo?
E ultimo punto aki ta uno cu ta trece hopi preocupacion den comunidad no solamente pa e echo cu ta pidi asilo, pero tambe pa e consecuencianan mara na esaki.
Lopez-Tromp ta spera cu Minister di Husticia por informa Parlamento por escrito riba e preguntanan haci.

Comments

comments