Marisol Lopez-Tromp: Inversion den nos infrastructura ta yuda stimula nos economia

Durante conferencia di prensa di Fraccion di POR den Parlamento, lider di e fraccion, Marisol Lopez-Tromp a enfatisa riba e importancia di inversion pa loke ta stimulacion di economia, den cual infrastructura ta hunga un rol primordial. El a indica cu recientemente Standard & Poors a declara cu e situacion di Aruba como uno stabile, cual ta algo hopi positivo y importante pa entre otro nos economia. Na nos isla tin mester di mas estimulo pa economia y den cuadro di esaki recientemente Minister di Infrastructura a anuncia cu lo bin cu un hotel na San Nicolas. Den e ultimo 20 añanan, gobernacionnan di diferente signature tabatin e intencion di bin cu un hotel pa e parti pariba di nos isla y finalmente bou Gabinete Wever Croes esaki lo por bay bira un realidad, segun Lopez-Tromp ta expresa. E ta agrega cu personanan por ta pro of contra, pero echo ta cu si kier bay diversifica nos economia, mester di ideanan exitoso, placa y cambio di ley. Te na e momentonan aki Aruba ta biba grandemente di turismo y si continua riba e rumbo di construccion di un hotel pa San Nicolas, eski lo yuda stimula nos economia no solamente pa pariba di brug, pero pa Aruba en general.
Un otro aspecto importante cu ta yuda stimula nos economia ta infrastructura en general. Recientemente Minister y Director di DIP a anuncia e entrega di terenonan erfpacht, cada tanto luna por ripara cu un grupo di ciudadano ta bin na remarca pa haya untereno erfpacht cu tanto nan ta anhela pa construi nan cas. Den cuadro di esaki Gobierno a bin cu un maneho nobo pa percura cu en berdad e personanan cu haya tereno por cumpli, naturalmente mara na diferente condicion. Construccion di un cas ta stimula economia, pasobra na momento cu cuminsa cu e construccion y tur loke tin di haber cu esaki, manera emplea hende, compra di material, hipoteca, etc tur ta yuda ya cu e ta sosode na Aruba. Es decir, cada persona cu construe un cas ta yuda na stimula economia di nos isla. Igualmente construccion di caretera ta contribui na nos economia y pesey lider di Fraccion di POR ta kere cu ta sumamente importante pa Gobierno reinstitui e Wegen en Infrastructuur Fonds (WIF), cual ta e fondo di caretera y cu basta aña pasa tabata existi y a traves di cual a logra construi hopi caretera den un forma structural. Di e forma aki por planea adelanta y stucturalmente cual ta e careteranan cu lo bay traha. Lamentablemente durante Gobierno di AVP e WIF a wordo para y awo, a pesar di e situacion financiero ta hopi importante pa concretisa e ley aki, pasobra e lo contribui tambe na stimulacion di nos economia. Esaki pasobra diferente Proyecto lo beneficia di un bon red di caretera, pero tambe nos ciudadanonan lo beneficia di dje y lo percura tambe pa mas trabou. “Ora inverti den caretera no ta un grupo chikito so ta beneficia di dje, ta henter bo pais ta beneficia di un bon red di caretera traha den un forma structural. Pesey mi ta spera cu Gobierno pronto lo por bin Parlamento pa reinstitui e WIF aki cu sigur lo yuda pa den un forma structural pa cada aña bo tin sumanan disponibel cu por planea riba dje y percura pa stimula nos economia di e forma aki”, Marisol Lopez-Tromp a conclui.

Comments

comments