Recientemente Banco Central di Aruba a publica su “State of the Economy” riba su website. Den e rapport aki pueblo por lesa pa su mes y conclui cu nos pais ta den un era di recuperacion real y cu un biaha mas e maneho di gobierno ta produciendo frutanan positivo. Esaki ta un bon noticia pa pueblo cu ta desea pa wak nos debe baha, nos economia y finanzas subi, inversionnan y proyectonan wordo crea, y inyeccionan financiero por yega na beneficio di nos pueblo.
Debe ta bahando drasticamente: Ta usando surplus pa paga debe nacional.
Ta bon pa pueblo sa kico ta wordo haci cu e surplus di pais Aruba. Den e Laft ta poni cu e 1% surplus mester wordo usa pa paga debe y si tin mas surplus esaki mester bay 50% pa debe y 50% pa inversion. Den e caso aki BCA ta reporta un surplus di 314.3 miyon florin y a usa 148.8 miyon florin pa paga riba e debe di pais Aruba. Hunto e crecemento di nos GDP y e pagonan riba nos debe nacional di pais Aruba a baha te na 84.5% di nos GDP pa fin di 2023. Esaki ta un bahada di 12.6% compara cu 2022.
Economia di pais Aruba a conoce un crecemento substancial atrobe.
BCA ta reporta cu na aña 2023 nos economia a conoce un crecemento di 5.2% mas cu aña 2022. Esaki ta debi cu Turismo ta keda crece y e turista ta kedando mas largo na Aruba. E ocupacion y tarifa di hotelnan tabata mas halto. Tambe e rapport ta indica cu turistanan ta gastando mas placa pafo di hotelnan.
Inflacion a baha na pais Aruba.
Na 2023 e inflacion di pais Aruba a bah ate na 3.4%. E percentage aki ta esun di mas abao den Reino y region di Caribe. Na aña 2022, ora Aruba apenas tabata saliendo di e pandemia, e inflacion tabata na 5.5%. Esaki ta un diferencia grandi di 2.1% entre 2023-2022.
Instancianan Internacional tur ta aproba y sostene maneho di gobierno.
Pueblo por wak cu constantemente e rapportnan di BCA, CAft, IMF, Fitch, Moody’s, y EBA ta keda demonstra cu Gabinete Wever-Croes II ta produciendo e tipo di maneho cu Aruba mester pa logra su recuperacion completo y cuminsa cana riba un caminda solido di progreso responsabel. Tur rapport ta keda papia e mesun idioma, tur iniciativa ta keda comproba cu gobierno ta busca y ta logrando solucion concreto pa problemanan structural di nos pais. Gobierno ta reformando nos finanzas publico efectivamente, ta cumpliendo cu normanan di CAft, ta bahando su gastonan, ta entregamento presupuesto na tempo, ta produciendo surplus riba presupuesto, ta pagando y bahando e debe nacional structuralmente, a haya upgrading di credit rating di Fitch y Moody’s, ta invertiendo den proyectonan crucial, a cuminsa e proceso historico pa construi un RWZI nobo, mientras EBA ta anuncia cu Aruba ta pais lider den clima di inversion, Union Europeeo ta kita Aruba di e “Lista Shinishi” declarando cu Aruba ta cumpli awor cu tur rekisito pa preveni practicanan fraudulento di belasting y labamento di placa, y hopi mas. Aruba ta progresando? Difinitivamente Gabinete wever-Croes ta logrando!
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!
