Ma tuma nota recientemente di otro publicacion y declaracion di sr.Miguel Mansur cu sigur no ta cuadra cu e berdad. Sr. Mansur a publica cu Accion 21 tin “cero” tolerancia pa corupcion. Segun Mansur, e lo bin cu un sistema di “one strike” cu lo aplica pa ambtenaar y mandatarionan condena pa corupcion. E personanan aki hamas mag di bin bek den nan funcion segun Mansur, y cu corupcion no mester tin luga den gobierno.
Cu no mag di tin corupcion den gobierno ta comprendibel, pero mi tin un problema serio cu Mansur ta concentra su narativa solamente riba ambtenaar y gobernantenan. Si di berdad bo lema ta “ban biba miho” y bo tin “cero tolerancia” contra corupcion, dicon anto nunca bo a uni bo mes na mi esfuerso pa elimina corupcion for di Parlamento? Si di berdad bo tin cero tolerancia pa corupcion, pakico bo a bay CONTRA un mocion pa eleva e standard di integridad den Parlamento ne mesun nivel cu esun di ministernan? Si di berdad Accion 21 tin “cero” tolerancia contra corupcion, con por ta cu bo no a apoya un comision special pa parlamentarionan bini hunto pa bati cabes na otro, pa formula un cambio di constitucion cu lo combati y mantene esnan corupto for di nos Parlamento? Si di berdad bo tin cero tolerancia pa corupcion pakico bo ta keda uza y brasa e corupto Benny Sevinger den Parlamento pa bo probecho politico? Esey bo ta yama “cero tolerancia?” No, esey bo ta yama hipocrecia y maldad 100% calcula!
Mansur: Exigiendo integridad di ambtenaar y gobernantenan, pero no pa su mes.
E pretexto cu mester laga ministerio publico haci su trabao ora ta trata un caso di un parlamentario sospechoso, ta e hipocrecia di mas grandi cu ta existi den Mansur, Marisol, Gerlien y AVP. Kiermen, Mansur ta exigi un standard y sistema “cero tolerancia” pa corupcion cu mester ta aplicabel pa tur otro hende, menos parlamentarionan? Pueblo ta compronde e hipocrecia? Pueblo por mira cla con Mansur ta hunga un “double standard.” “Cera nan pa corupcion, pero abo por keda liber.” Cero tolerancia pa nan, pero tur tolerancia pa bo!” Esaki ta e politica nobo di “Ban biba miho”, of ta mas bien e politica nobo pa “Mansur biba miho?”
Mansur no por wordo tuma na serio.
Aparte di tin un standard dobbel, Mansur no por wordo tuma na serio. Como parlamentario e ta nenga pa expresa su mes contra e situacion di corupcion cu ta biba den Parlamento. Ta bisto cu no ta importante pa Mansur pone “cero tolerancia” den Parlamento, pasobra e mes no kier cay bao di esaki. Si Parlamento, cu ta controlado y hefe di ministernan, no tin “ley y reglanan” pa mantene e instituto uno integro, di ki cero tolerancia contra corupcion bo ta papiando anto? Mansur, bo tin cero (0!) intencion pa bin cu un cambio di constitucion cu lo implementa un “cero tolerancia” den Parlamento. Alcontrario, Mansur ta sinti’e feliz y e ta “biba miho” probechando di e situacion caotico aki. E realidad ta, Mansur ta un politico di dos cara, pero cu un solo intencion: “biba miho usando corupcion.”
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!
