Diabierna 26 di mei e concepto di Ley di BBO na frontera a yega na Parlamento. Den e Centrale Commissie a wordo dicidi cu cada Parlamentario lo haya 3 siman pa lesa e ley y haci pregunta riba e ley aki. Tambe a wordo dicidi cu den juni lo invita stakeholders, gremionan y comerciantenan pa bin Parlamento pa vocifera nan preocupacion, idea y opinionnan. Mirando cu ta importante pa scucha tur e gremionan debidamente, Parlamento lo tuma su tempo pa scucha y dialoga cu nan. Mirando cu den ultimo simannan tabata tin hopi asumcionan di gremionan ta solamente corecto pa duna nan e importancia y atencion debido, mirando nan ta di gran balor pa nos economia y sociedad. Asina tambe gremionan lo sa di diferencia contenido y aplicacion di e ley di BBO na frontera versus e declaracionnan insincero di politiconan hambra pa poder.
Amplio splicacion di Gobierno, DIMP y Douane riba BBO na frontera
Asina nos por a wak cu diahuebs pasa Minister di Finanzas sra. Xiomara Maduro hunto cu directora di DIMP, sra. Luenne Gomez-Pieters y sr. Ricky Croes di Douane a splica ampliamente riba e tema di BBO na frontera y e contenido di e ley. Ademas nan a sigura cu lo continua pa sinta cu stakeholders y gremionan riba e ley y asina informa tur hende debidamente y contesta tur pregunta cu por tin. E importante ta pa tur comerciante compronde e materia debidamente pa asina evita di subi e prijs di su productonan. Esaki ciertamente sigur lo evita cu inflacion lo subi innecesariamente, cual lo por a crea un impacto negativo riba nos economia.
BBO na frontera ta crea un Mercado mas husto pa tur comerciante
Ta normal ora cambio bini cu hende no gusta esaki. Sinembargo mester corda kico Comerciantenan Uni a bisa for di 2022 caba di e ley:
CUA a sugeri pa bin cu e ley di BBO na frontera;
BBO na frontera ta crea Level-Playing field, cu ta significa cu awor negoshinan ilegal tambe mester paga BBO y mester pone nan prijs mas na nivel di esun di e comerciantenan legal;
Negoshinan ilegal tambe ta aporta awor na caha di gobierno;
Negoshinan ilegal aworaki lo mester inscribi den e sistema di belasting si nan kier nan BBO bek;
BBO na frontera ta aftrekbaar e mesun luna di e omzet.
Apesar cu tabata tin hopi asumcion, preocupacion y insinuacion di comerciantenan y gremionan, awor cu e ley a sali, expertonan di DIMP y gobierno lo sigui splica e contenido di e ley pa tur hende tin claridad. Di e forma aki gobierno di Aruba ta demostra na e comerciantenan cu gobierno a sigui nan sugerencia pa trece BBO na frontera cual awor ta bay yuda crea un mercado cu condicionnan mas husto pa tur negoshi por prospera, competi y existi hunto.
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!
