Diaranson 7 di februari ultimo Parlamento a trata e ley di presupuesto di DOW. E presupuesto aki ta duna tambe tur presupuesto financiero pa cada departamento di DOW. Ademas e presupuesto ta trata entre otro temanan manera mantencion di nos infrastructura, nos careteranan, edificionan di gobierno, renobacion di e riolering di nos pais y hopi mas.
Gobierno tin Afl. 10.4 miyon presupuesta pa drecha careteranan
Den e reunion publico di e presupuesto di DOW mi a puntra Minister President Evelyn Wever-Croes cuanto placa a wordo destina pa drecha e careteranan di Aruba. Aki Minister President a splica den su contestacion cu a aloca Afl. 2.6 miyon di e presupuesto, mas Afl. 2.8 miyon di e post di inversion y finalmente Afl. 5 miyon adicional di e suma di RWZI cu no lo cay mas bao di e presupuesto di DOW. E suma total pues cu gobierno lo inverti pa drecha nos careteranan ta Afl. 10.4 miyon! Esaki ta e suma di mas grandi den 10 aña cu lo bay wordo inverti den nos careteranan! Sigur pueblo ta preocupa cu e situacion di nos infrastructura y pe motibonan ey tambe Minister President Evelyn Wever-Croes a sigura cu lo inverti structuralmente pa pueblo por wak paso pa paso con e careteranan lo wordo drecha. Esaki sigur ta un bon noticia pero tambe un accion necesario pa salbaguardia nos careteranan.
Preguntanan di ciudadanonan dirigi pa Minister di Infrastructura
Durante di e reunion publico mi a lansa varios pregunta pa Minister President, di cua paar ta di ciudadanonan cu a acerca mi. Eaki ta algun di nan:
DOW por traha un turbo-rotonde ne salida di Superfood cu ta subi riba caya principal?
DOW por traha un “verkeersplateau” dilanti Pos Abao 59, cu ta un speelschool?
DOW por laga traha un “verkeersplateau” bandi Anglo Kleuterschool na Madiki?
Ki tempo gobierno lo entrega e ley pa independisa RWZI mirando e urgencia y necesidad pe proyecto aki keda cla?
DOW ta bay traha apenas 10 verkeersplateau na 2024. Si por considera traha mas mirando e necesidad y peticion di pueblo pa esakinan. Adicionalmente mi a puntra si e diferente sorto di verkeersplateau cu ta traha di un material diferente ta costa mescos y si tin cu ta mas barata cu otro.
Mi a menciona diferente careteranan den hopi mal estado manera esun di Tanki Leendert-Tankiflip, caminda principal di Dakota, Franse Pas, Judo Center na Tankileendert – Sikkens entre otro y cu mester di drechamento y pa ki tempo lo completa esaki.
Mi a puntra pa Gobierno duna un update ki dia lo cuminsa ke trabaonan di drecha e riolering y caminda dilanti High Rise hotels.
Mi a puntra Minister President riba e reduccion di e gasto di Goederen en Diensten di Afl.33.284.200 pa Afl.31.848.600.- cu ta un suma di Afl.1.435.600 menos cu 2023.