Den cuadro di crecemento di criminalidad na Aruba, Comision ProSiguridad a wordo crea pa un grupo di ciudadanonan preocupa cu e ultimo desaroyonan negativo na nos isla. E meta di e comision aki ta haci un yamado na gobierno pa atende cu e asunto importante aki y bin cu un solucion inmediatamente. Nos pueblo ta sinti cu e maneho di gobierno pa combati criminalidad a faya y tin e percepcion cu hopi di e instancianan superior ta negligente.
Tambe ta hopi importante pa señala cu e marcha aki no tin niun interes politico y cu contrario na esey, nos comision ta invita miembro di tur partido, gremio, sindicato y tur organizacion pa uni na nos causa.
Nos comision ta conta cu steun di STA, TOPA, SCCA, UPA, SIWA, comerciantenan y ta spera cu tur ciudadano por uni pa nos por frena criminalidad y e ola di maldad na Aruba, un isla cu semper tabata conoci como un lugar hopi sigur.
E preocupacion di e comision aki ta resumi e temornan di henter nos comunidad, ya cu trankilidad na Aruba a bay perdi. Lanta placa, keiro anochi, sali trip, haci compras y realisa otro actividadnan a bira algo cu nos hendenan ta sinti hopi miedo pa haci. E modalidadnan pa atraca a bira masha innovativo y ta na cualkier caminda bo por wordo agredi. No ta solamente anochi tin episodionan di criminalidad, pero awo hasta den dia cla.
Nos tur sa cu Cuerpo Policial tin man yen y cu e no a wordo reforsa den 4 aña. Warda Nos Costa no a wordo reactiva tampoco, Visibility Team a disparce; ni radar nos tin, corda helicopter.
Den e aña aki nos isla a conoce cifranan nunca antes mira pa loke ta referi kiebro, ladronicia, joyriding, atraco, adictonan riba caya, ilegalidad y hasta asesinato.
E circulacion di arma di candela ta alarmante y castigo pa esnan cu ta porta nan ilegalmente, no ta severo.
Comision ProSiguridad tambe kier pone enfasis cu no pasobra criminalidad a subi rond di mundo, nos mester acepta cu na Aruba esey tambe mester bira un realidad. Nos ta convenci cu e presupuesto pa Ministerio di Hustica mester por lo menos wordo duplica, pasobra sin siguridad no tin un desaroyo social ni economico manera mester ta.
Comision ProSiguridad ta invita henter pueblo di Aruba pa marcha cu nos pa nos haya nos siguridad back. E marcha nacional lo tuma lugar dia 13 di October, 2016 pa 4pm. E lugar pa topa lo ta Post Kantoor. Ban tur uni den un clamor nacional pa stop criminalidad awor, ta basta; nos kier biba trankil den nos cas!