Jose Giron, kende tabata forma parti di e comision Pro Siguridad y Contra Criminalidad, a splica cu a yega e momento cardinal pa ciudadanonan cu tin cu cuminsa atende cu nos problemanan interno, si nos kier sobrevivi y pasa e crisis moral aki cu ta tumanod luga riba nos pais of miho bisa crisis inmoral.
Si bisa nos, ta indica cu ta un lucha di un solo pueblo, e hoben, e anciano, e grandinan, e homber, e muhe. Ta nos tur ta wordo asota cu locual cu ta tumando luga riba nos pais. Ya tin cu bisa cu como ciudadanonan cu semper a biba den pleno libertad, awe ya pa 7’or nos tin cu cera nos porta y bentanana. Ora cu nan sali, haci nan diligencia, nan no ta sigur si nan ta bin bek nan cas. Pasobra e ola di crimen, atraco cu ta tumando luga no sa ki ora e ta yega cerca bo. E no ta excepcion pa ningun hende. Pa e criminal, no tin e color, ni edad, e ta haci su fechoria, laga e daño atras. Si nos no atende cu e casonan aki, nos ta bay bira culpabel di nos propio echonan. Si nos no por haci’e, ningun hende ta bin haci’e pa nos. Pesey ta bisa cu ta scucha cierto gremionan. Cu color na curason ta bisa cu nos no ta cla pa bay den accion. Si 7 aña largo ta sufriendo riba e parti aki, kico mas ta warda pa ora cu nos tur wordo likida pa e ora tuma accion, e ora bo no ta serio cu bo mes ni cu e pais. Giron a papia palabranan cla, pasobra e ta sali for di su curason. A yega e momento pa sali padilanti y dia 29 di September, ta e dia cu tin e chens pa haci esaki. Riba e dia aki tin cu mustra nos representantenan den Gobierno, tur esnan cu ta comete fechoria, cu ta basta, cu no lo ta dispuesto pa sigui atende cu nan na e sistema cu ta tratando nos pueblo. Si bo no tin e curashi, bo no tin e decencia, e ora hala un banda, laga nos pone hendenan cu por yuda. No lo admiti mas, no kier mas pa e cos aki continua y tin cu pone un punto final na e cos aki y tin sigur cu ora cu cera cabes, ora cu para en bloke, cu lo logra esaki. Ta spera un y tur sigur pa compaña e comision riba e lucha aki.
E Manifestacion nacional pa nos siguridad lo tuma luga manera ya menciona dia 29 di September, cuminsando pa 4’or di atardi. Luga di encuentro lo ta for di Postkantoor Playa direccion cocolishi.
Segun Rene Bernabela, pa motibo di logistica, a scoge e ora di 4’or, mirando cu e custumber na Aruba, ta duna un oportunidad na esnan cu ta traha den Gobierno, cu kier yega despues di ora di trabao, kier uni, lo por ta un posibilidad y tambe alabes ta haciendo na e momentonan aki un apelacion na e gremionan comercial pa nan tambe por haci un excepcion dia 29 di September y nan por laga nan trahadonan sali un tiki mas tempran pa nan por bin e ora ey na e marcha dia 29 dilanti di postkantoor. Esaki ta un apelacion na gremionan comercial, cu conhuntamente cu sindicatonan, pa e partinan aki pa combina e dosnan aki hunto y pa haya e pueblo total uni na e marcha dia 29 di September, pa 4’or di atardi. Por bisa cu Gremio comercial y sindical ta hunto den esaki.