Maradona tabata den e seccion VIP den e stadion caminda cu e partido entre Nigeria y Argentina a tuma luga. Durante e partido aki, di Argentina contra Nigeria, den e Mundial Rusia 2018, Diego Armando Maradona a bolbe bira protagonista di locura y exceso.
Den e oportunidad aki, nan a graba e ex astro di futbol Argentino, unda cu claramente por a wak cu e no tabata “na tino”. Pero esaki a bira custumber caba, di wak’e den e estado aki. Pero pa Maradona ta custumber caba pe, di haci su mes ridiculo unda cu e bay.
Despues di cu Rojas ta anota e di dos gol pa Argentina den e di 86’, tur e miradanan a bira pa e ex futbolista Argentino, cu a haci un gesto obseno pa cu e fanaticonan.
Despues di e partido, Maradona mester tabata tin mester di yudansa pa baha e trapinan di e seccion VIP. Causanan pa esaki no ta conoci.
Segun e pagina TN.com.ar, Maradona su presion a baha pa cual el a wordo atendi pa e dokter di e seleccion di Argentina. Despues di un checkeo breve, el a wordo traslada pa un hospital di e zona.