Director di Stinapa y miembro di directiva DCNA, Sr. Arjen de Wolff, ta elabora riba con nan ta deal cu Parke Marino na Boneiro.
Sr. de Wolff ta splica cu tabatin varios combersacion positivo en cuanto e desaroyonan cu tin na Aruba pa loke ta e Parke Marino. E ta mustra cu DCNA por sostene y conseha Parke Marino di Aruba, pues nan tin experiencia cu seis diferente isla. Nan ta purbando di soluciona cierto problemanan cu tin di haber cu e parke y proteccion den un balansa hunto cu comunidad. Nan ta satisfecho di por combersa cu nan parke ruman di Aruba pa wak den ki manera DCNA por duna sosten y transferi nan experiencia.
En cuanto e situacion di e piscadonan di Aruba, Sr. Wolff ta duna ehempel cu na Boneiro tambe nan tin un comunidad chikito di piscado y nan tin un dialogo habri y permanente entre e autoridad cu ta maneha e parke y e piscadonan. Tin diferente palabracion pa yega na un acuerdo cu otro, por ehempel nan ta traha riba cierto permisonan y e maneranan con e practica di piscamento ta wordo haci den un Parke Marino. Hopi hende ta pensa cu un piscado no por pisca den Parke Marino, cual no ta berdad. Esaki ta funciona hopi bon y mester combina diferente meta, diferente resultado, diferente interes y speransa di hendenan cu ta preocupa pa mantene nan pan di cada dia riba mesa y nan posicion tradicional den comunidad. Den comunidad mester tene na cuenta tur locual hunto ta hiba e isla dilanti.
Sr. Wolff ta remarca cu nan tin un asociacion di piscado hopi bon y activo na Boneiro y nan tin un relacion hopi habri cu nan te cu autoridad di parke y e piscadonan a sali den prensa hunto pa papia riba e importancia pa proteha cierto areanan di e Parke Marino, pues pa crea cierto zonanan cu ta prohibi piscamento netamente pa crece e cantidad di piscanan bek.