BRASILIA, Brazil- Organisacionnan social y politico di Brazil diahuebs a manifesta den e sede di e compania Coca- Cola, ubica na Samambia, area pafo di Brasilia, capital di e pais. Esaki a wordo haci en conexion cu e Dia Mundial di Awa pa rechasa e uzo priva cu e multinacionalnan ta haci di e recurso aki.
E protesta a dura rond di mei hora, durante cual a logra paralisa e produccion di e planta. “Nos ta denuncia e transnacionalnan Nestlé, Coca-Cola, Ambev, Suez, Brookfiled (BRK Ambiental), Dow AgroSciences, entre otra, cu ta pretende di privatisa e dam y poznan di awa pa produccion di bebida”, segun un manifiesto cita pa Brasil de Fato.
Entre e convocantenan tabata tin e Movimento di Afectadoann pa Represa (MAB), di e Levante Popular di Hubentud, Movimento di Agricultornan chikito (MPA) y e Movimento di Trahadonan Rural sin Tera (MST).
Mester destaca cu actualmente ta tumando luga na Brazil, for di 19 pa 23 di maart, e Foro Mundial di Awa organisa pa World Water Council y cu e participacion di varios compania. Den cuadro di esaki tamba a realisa algun protesta na Brasilia.
Segun datonan publica den e encuentro aki, 35 miyon Brazilero no tin acceso directo na awa y otro 60 miyon no ta conta cu e recursonan basico di higiena.
Den forma di protesta, e movimentonan social ta impulsando nan propio cumbre yama Foro Alternativo Mundial di Awa (FAMA) di cual a surgi varios iniciativa di reclamo.
E medio cita a recorda cu na januari presidente di Brazil, Michel Temer a participa den un dinner durante e Foro Economico Mundial na Davos, cu e director di Nestlé, Paul Buckle y otro companianan manera Ambev, Coca-Cola y Dow. Tur di nan ta forma e compania 2030 Water Resources Group (2030WRG) cu, segun medionan di comunicacion, kier “privatisa” awa.