Drechamento di careteranan 1 di e 4 puntonan mas importante den maneho di Ministerio
Careteranan den diferente bario rond Aruba ta ricibiendo asfalt. 1 di e 4 puntonan cu ta dirigi Ministerio di Desaroyo Teritorial, Infrastructura y Medio ambiente ta e hecho cu kier atende cu e ‘netwerk’ di camindanan. Esaki a keda atras enormemente durante e ultimo añanan. A concentra berdad riba proyectonan grandi manera Green Corridor y Watty Vos Boulevard, pero masha poco atencion a bay na nos careteranan existente. Actualmente tin un deficit di cerca di 300 miyon florin cu mester na e momentonan aki pa por atende cu tur e problemanan di nos carteranan. No tin e suma aki, pero na un forma efectivo a hinca un maneho den otro hunto cu DOW pa yuda e situacion, Minister Otmar Oduber ta splica.
Por a tuma nota cu durante di e ultimo simannan DOW a inicia cu trabounan di asfalt den diferente bario rond Aruba. Caminda cu a reparti e trabou den 3 sorto: (1) construccion di caminda, unda cu camindanan di tera ta bira asfalt cual ta prioridad na e momentonan aki pa motibo cu e hendenan den e situacion aki a sufri hopi aña pa motibo di stof, (2) Tin trabou andando di tapamento di buraco riba diferente caminda y cu pues mester wordo manteni, (3) y tin tambe e careteranan cu mester wordo drecha di nobo. Tur e trabounan aki ta andando na mesun momento, pero cu concentracion particularmente riba camindanan di tera. Minister Oduber a sigui splica cu door di e detereoro y falta di atencion di careteranan durante e ultimo añnan, ta wak hopi caminda principal di asfalt cu tin hopi krak den nan. E kraknan aki ta bira mas y mas cual despues ta bira buraco. Ta papiando cu DOW y instancianan pa mira ki tecnologia / material por tin pa yena den e kraknan aki pa evita cu nan ta bira buraco. Cual lo significa cu e inversion lo bira hopi menos, bo por rek e bida di e camindanan cu algun aña mas. Pa por sigui concentra e fondonan limita cu tin den e camindanan di tera cu tin den diferente bario.
E reaccion di comunidad pa e trabounan aki ta sumamente positivo y ta haci cu mas persona cu ta wardando pa nan camindanan tambe wordo asfalta tambe ta reaccionando cu nan peticon. Ta informa comunidad cu poco poco ta bay ta atendiendo cu esakinan. Gobierno tin e punto di drecha nos careteranan como un di e manehonan di mas importante pa e Ministerio aki. Cual ta e motibo cu ta bezig cu un plan pa sigura un contract cu compania local di Aruba cu ta bay traha caminda y percura cu tin e fondo necesario (dentro di e margen di ley di contabilidad cu Gobierno por firma un contract di 5 aña maximum), pa por acelera e trahamento, drechamento, y mantenimento di careteranan na Aruba.