Pa loke ta e situacion di pension di trahadonan di Serlimar, caminda cu APFA a bati alarma cu nan tin un atraso di 3 luna, Sindicato STA a bin ta adverti for di 2014 kico ta bay ta e consecuencianan ora cu un minister a pusha mas di 200 hende den Serlimar, sacando nan for di bou di e begroting di DOW, y pushanan den e begroting di Serlimar.
Consecuentemente, e ta un peso hopi grandi ariba e presupuesto, caminda cu mester kies of ta pone salario di e trahadonan pa nan por sigui pone pan ariba mesa of ta bay paga belasting. E ora ey, niun hende no por cobra mas. Aki ta caminda un eror grandisimo a wordo cometi. Ora cu a emplea e 200 hendenan aki, no a tene cuenta cu e presupuesto cu Serlimar no por a want’e. Prome cu esey caba Serlimar tabata den un problema, pasobra hopi hende no tabata vast. Y aworakinan na 2014, ora cu a tira e hendenan ariba e presupuesto, nan a caba di zink e barco. En berdad, eror a wordo cometi, pero cu bendicion di e minister en cuestion.
E porkeria cu e gobierno actual a hereda, segun Sr. de Cuba, pero no por wordo drecha asina lihe. E desaster cu e gobierno aki a hereda, ta dificilmente por drech’e den 2 pa 3 aña. Pasobra cu STA a maak mee kico nan a hereda, y STA tabata sa kico nan ta bay hereda tambe. Y ainda tin mas pa bin, segun Sr. de Cuba. Tin mas sorpresa ta bay bin. Aworaki e trahadonan, cu tur nan razon, a manifesta, ya cu e situacion aki ta casi imposibel.
Por mira cu politikeria ta wordo haci cu e situacion aki di Serlimar. E hendenan aki no por perde nan pension, ya cu nan tin 30 aña caba ta pagando riba nan pension. E atraso mester bin in areglo pe. STA ta buscando un solucion pe y minister hunto cu Serlimar a logra yega na un solucion y APFA a informa STA ariba dje. STA tambe ta hay’e den un situacion hopi fastioso ya cu nan, mescos cu e trahadonan, ta keda cu pregunta den nan cabes, y esaki no por pasa mas.
Tin hopi cosnan administrativamente cu ta sosode, cu sindicato no ta haya sa. Si e tempo ey, APFA a grita manera cu el a haci awo, STA lo a sali, pero durante e gobierno anterior, tur cos tabata permiti. Y awo cu tin otro gobierno, APFA ta trece esaki den claridad. Y dicon despues di 3 luna di atraso ta core bati alarma. Minister hunto cu e Management Team di Serlimar, a yega na un solucion satisfactorio cu APFA.
STA kier mas transparencia pa asina nan sa kico ta pasando, ya cu cosnan asina tin consecuencianan pa e trahadonan. Primanan cu no wordo paga na Loonbelasting, AOW/AWW/AZV y pension, cada trahado ta keda responsabel pa cu esaki. Y esaki ta loke mester wordo comprondi. E gobierno anterior a faya barbaramente.
Sindicato por bay cerca nan miembronan, cu nan permiso, por pidi pa wak nan salarisslip pa wak si nan ta pagando nan primanan. Pero e trahado ta asumi cu e doño di trabao ta pagando esakinan. Y si esaki ta pasando mas caminda, sindicato kier sa cuanto e buraco ta y nan kier sa cuanto e ta bay costa. Sindicato no por hole e cosnan aki. Y aworakinan, cu tin puito ta sali for di macuto, a bira momento cu sindicato lo haci mas pregunta.
Tur trahado tin derecho di haya sa si su doño di trabao ta pagando su primanan social. Y e tin derecho di bay APFA y haci su preguntanan libremente. Cualkeir trahado cu tin duda den esaki, por haci cualkier pregunta. Nan por bay na Recurso Humano of Directie Financien, y nan averigua si berdaderamente, e placa ta woredo paga. Den caso di Serlimar, e ta algo hereda.
Den ministerraad nan a ripara e blunder cu a wordo haci, ora cu Sr. Sevinger a pusha mas cu 200 hende den e compania, y ora cu nan a ripara cu no tin placa pa hinca den Serlimar pa cover up e buraco cu nan mes a causa, nan a haya nan den panico, nan a geef door e decision na gerencia di Serlimar, esaki a dicidi di no paga e primanan, pa e trahadonan por sigui paga.
Aworaki e decision a cay caba, lo bay cobra pa recoge sushi, e lo alivia e situacion di Serlimar, e ora Serlimar lo tin un entrada fiho cu bo sa con pa handle cu tur e debenan cu e tin y no manera cu e ta aworakinan. Te asina leu e relato di Sr. Diego de Cuba, di sindicato STA.