Managernan di ELMAR ta welga despues di caba haya bonus

Awe den oranan di mainta a drenta informa cu tin un welga na ELMAR na Playa. Hopi hende a keda sorprendi pasobra no ta e trahadonan, pero esnan den posicion di hefe of supervisor ta esnan cu a dicidi di pone trabou abou.

Informacion cu MasNoticia a acumula ta indica cu e problema pa e supervisornan ta relaciona cu mas placa cu nan kier, mientras cu nan a caba di duna na un bonus.

E problema di ELMAR no ta algo cu ta data di awo. E diferente Gobiernonan como pueblo a bin ta kehando cu N.V. ELMAR y WEB Aruba N.V. ta dos empresa estatal cu tin grupo di trahadonan cu salarionan hopi halto. Esaki ta un problema specialmente pa e pueblo. Ya caba por a nota cu den e tempo di inicio di pandemia, tabatin hopi critica pasobra tabatin problema pa ta solidario.

E problema di miembronan di e sindicato ALVAST for di siman pasa caba a cuminsa los informacion cu nan ta preparando pa bay den accion pa  motibo cu gerencia no kier cumpli cu nan, pero no ta menciona kico ta loke cu nan kier.

Informacionnan ricibi ta  mustra cu e motibo tras di e accion ta cu gerencia a dicidi cu no a bay di acuerdo pa duna nan e aumento di 85 florin. Gerencia a informa nan cu esaki no ta e miho momento pa bay di acuerdo cu e aumento di 85 florin.

A informa nan debidamente pakico e suma aki no por wordo otorga y con di otro banda lo trata di yuda nan pa no wordo perhudica completamente den e temporada dificil aki.

Di otro banda, por a compronde cu recientemente tur trahado di e empresa estatal aki a cobra un bon bonus, cu nan salario di e luna aki, mientras cu gran mayoria di poblacion laboral di Aruba no tin esaki y momento cu gran cantidad di persona ainda no tin un trabou y ta depende di yudansa di gobierno of Hulanda pa come.

 

Por a compronde cu miembronan di sindicato STA no ta bin na remarca pa e aumento aki door cu e aumento ta pa un grupo chikito cu contracto lucrativo unda cu e salarionan no ta normal segun e normanan actual. Segun e miembronan di e otro sindicatonan ta expresa cu e grupo aki tin hopi beneficio, unda cu e opzichternan ta probecha di hopi beneficio adicional y ainda ta exigi mas y mas, mientras cu e situacion actual ta hopi delicado na Aruba.

Aparentemente tin un grupo den Elmar cu semper tabata probecha hunto cu directornan anterior y awor cu tin mas control ta purba pone e gerencia nobo den noticia negativo. Tin un grupo cu kier sigui fiesta den Elmar y ta purba todo por todo pa stroba e director nobo di haci su trabou manera mester ta.

Pa hopi aña tin hopi weganan den Elmar unda cu famianan di ex-director ta wordo poni den funcionnan clave den e compania y unda cu tin diferente empleado ta cera cabes p’asina haci negoshi lucrativo durante oranan normal di trabou. Ainda por corda e caso fraudulente cu tabatin na Elmar 4 aña pasa unda cu diferente empleado tabata envolvi hunto cu algun compania. Esaki ta algo cu sindicato di e trahadonan di ELMAR a denuncia hopi biaha den pasado.

P’esey tin empleadonan rabia pa motibo di cierto decision di nan hefe di departamento cu ta gana un capital na salario pero no ta funciona debidamente y hustamente e hefenan aki ta esnan cu ta reclama cu a pospone e pago di e aumento.

Durante e blackout na WEB, comercio a haya un sla duro caba. Awor ta e hefenan na Elmar a pone trabou abou despues di 4:30, pues den caso di un blackout, ta pueblo y comercio lo wordo perhudica atrobe.

Por corda tambe cu den pasado a circula un lista caba cu nombernan di empleado cu salarionan haltisimo y kisas ta e mesun grupo di hefenan aki ta core pone trabou abou mientras cu nan a caba di cobra un bonus den un periodo cu tin hopi hende ta sufri ainda pa motibo di e pandemia.

Comments

comments