Sra. Marjorie Vermeer-Luidens, presidente di MAMBO ta comenta tocante e reunion cu MAMBO tabatin cu Minister Chris Romero.
Segun Sara. Vermeer-Luidens, e miembronan di Mamboo a haya invitacion pa reuni cu Minister Romero tocante e asunto di Parkeermeters den Caya Grandi. Nan a combersa riba kico por wordo haci pa cu esaki. E reunion tabata fructifero pa ambos partido y a bin cu e decision pa mengua e Parkeermeters, haci nan hopi mas cerca di Caya Grandi, pone tur e liñanan geel den zonanan special pa personanan cu ta paga pa luna, y e resto lo wordo haci blanco pa parkeo gratis.
Naturalmente lo tin control pa sigura cu personanan parkeer bon. Un otro punto cu a trece dilanti ta na Renaissance Mall unda esaki ta yena cu lineanan geel y masha poco espacio pa parkeer, siendo cu e no ta un zona cu ta traha p’e trahadonan. Nan a propone e sistema di hefboom, e ora personanan por paga, ricibi nan carchi, bay paden, despues bay na un mashin unda nan por paga p’e tempo cu nan a keda. E ora e ta bira un sistema cu ta ley pa un, ley pa tur. Sra. Veermeer-Luidens ta haya cu asina personanan por sinti nan mes bon bini atrobe den Caya Grandi. Actualmente e proposicion di hefboom lo bay wordo studia, mientras e otro acuerdonan lo bay door.
Un otro deseo di MAMBO ta pa trece mas turistanan den Caya Grandi, pero ta conoci cu e Tram ta stop di traha pa 4’or di atardi y negoshinan ta cera trempan, cual no ta na beneficio di turistanan di barconan crucero cu t’ey den oranan di atardi pa anochi. E meta tabata pa pidi barconan crucero bin den oranan di atardi p’asina duna oportunidad na turistanan di e barconan pa experiencia Caya Grandi den oranan di anochi. Sra. Vermeer-Luidens ta mustra cu esaki nunca a sosode y lo mester extende e orario di Tram pa por transporta turistanan p’asina trece bida bek den Caya Grandi den oranan di anochi.