CIUDAD DI VATICANO, Vaticano – Tur cos ta prepara riba Plaza di San Pedro pa Mama Teresa wordo pronuncia santo, den e ceremonia mas importante di e Hubileo institui pa papa Francisco pa recorda e necesidad di Misericordia, cu tabata busca pa transmiti e religioso den e cayanan di Calcuta.
E ceremonia di canonisacion di diadomingo lo ta e evento mas importante y cu mayor simbolismo di e Aña Santo y lo combina tradicion di e rito, cu su formulanan na Latin, cu e tecnologianan mas halto y despliege di medio pa transmision di e evento via e Centro Televisimo Vaticano.
E canonisacion di Mama Teresa, kende tabata e prome Premio Nobel den subi altar di iglesia catolico, a prepara na Vaticano cu misa den diferente idioma celebra diabierna den e basilica di Santa Anastasia na Roma, unda cu fielnan por a venera e relikia di e beata cu diadomingo lo wordo traslada na e altar di San Pedro durante e ceremonia.
Ademas diasabra, papa Francisco a celebra un audiencia cu e operario y boluntarionan di misericordia riba e Plaza di San Pedro y a recorda e importancia di e canonisacion aki door di invita na imita e ehempel di mama Teresa di Calcuta “pa alivia e sufrimento di mundo.”
“Mañan nos lo tin e alegria di mira mama Teresa proclama santo. E testimonio di misericordia di nos tempo ta añadi na e inumerabel lista di homber y muhenan cu a haci visibel cu su santidad e amor di Cristo,” e pontifice a recorda.
Celebracion na Aruba
Den cuadro di esaki tambe, Grupo di oracion Catolico “The Voice of Jesus” ta invita tur fiel y deboto pa asisti na e celebracion di Santa Teresa di Calcuta diadomingo, dia 4 di September 2016, riba e tereno bendiciona na Koyari.
Pa 7:20 di anochi lo cuminsa cu un Santo Rosario, djey un procesion na su honor, sigui pa un historia di su bida, su pasion y su stimacion pa Hesus, y su cumplimento di su promesa, te na final di su bida. Su dos milagernan a conduci, cu dia 4 di September 2016, e canonisacion oficial lo wordo efectua pa Papa Francisco, caminda Mama Teresa, lo bira Santa Teresa di Calcuta. Tur fiel y deboto ta cordialmente invita. Bin sin falta.
Fuente noticia internacional: NTN24