GEORGIA, Merca – E mama a hiba su yiu hospital e dia siguiente y a gaña riba loke a sosode. Awo e ta wordo procesa pa homicidio y maltrato infantil.
E muhe Mericano a laga su yiu, un baby di tres luna, cay na suela durante un pelea ariba caya cu’n otro muhe, a wordo acusa di homicidio, despues di cu e menor a muri a causa di e lesionnan sufri durante e caida.
E caso aki a tuma luga diasabra ultimo den e parkeerplaats di un tienda di cosmetico na Moultrie, Georgia, Merca. Riba e imagennan capta pa un camara di vigilancia por wak con Karen Harrison, mama di e baby, ta reclama un otro peresona algo, mientras cu e tin su baby chikito den brasa.
E di dos muhe a reacciona door di dal Karen cu e saco di compras, na cual Harrison ta laga su yiu bay pa responde na e agresion fisico. Di biaha, varios testigo a interveni pa stop e pelea y a lanta e baby for di suela, cu a haya golpinan na su cabes ora el a cay riba e asfalt.
Un dia despues Harrison a hiba su yiu hospital. E muhe a gaña dokternan riba loke a pasa, sigurando cu e mucha a cay for di brasa di su amiga Carneata Clark, cu a confrima e version aki.
Pero autoridadnan a descrubi e berdad basta lihe ora cu nan a haya sa di e conflicto protagonisa pa Harrison. E muhe a wordo deteni pa homicidio y maltato infantil. E no por sali bou di fiansa, mientras cu su complice a wordo aresta pa obstruccion di husticia.
Autoridadnan no ta descarta pa presenta cargo contra di e otro participante di pelea fatal aki, cu a wordo identifica caba pero cu te ainda ta den libertad. E caso lo bin dilanti dia 7 di oktober.