BIRMINGHAM, Alabama – E mama di Natalee Holloway no a stop di busca husticia desde cu su yiu muhe a disparce 11 aña pasa. Y el a bisa cu e sa kende ta tras di e desaparicion di e adolescente.
Durante un aparicion na Today Show, Beth Holloway a bisa cu e ta sigur cu Joran van der Sloot ta tras di e hecho.
“Mi tin mi contesta kico a pasa cu Natalee y e ta sintando den prizon na Peru,” Holloway a bisa.
Natalee a disparce na Mei 2005, mientras cu e tabata di biahe na Aruba cu algun amigo despues di su graduacion escolar.
Ultimo biaha cu el a wordo mira tabata hunto cu Van der Sloot pafo na un bar. E Hulandes a wordo aresta varios biaha pero nunca culpa den e desaparicion di e hoben di 17 aña.
El a agrega cu “Esey lo ta husticia p’ami, pa mi por wak’e sirbi tempo na Merca. Esey lo ta husticia pa Natalee.”
Holloway, kende a bisa cu e y su famia a “haci tur cos” pa resolve e caso, pa hopi largo a sospecha van der Sloot di e desaparicion di su yiu muhe y hasta a drenta den un prizon na Peru pa confront’e na 2010.
Fuente: people.com