Malcontento creciente tocante economia y mercado laboral

Willemstad Curacao: Bahada di sifra di desempleo ta un refleho di bahada di migrashon
Den luna di sèptèmber 2018, Ofisina Sentral di Statistik (CBS) a tene e Enkuesta di Forsa Laboral (na hulandes, AKO) na Kòrsou. AKO ta un enkuesta anual di kas di famia. For di 1987, ta tene esaki tur aña den luna di sèptèmber/òktober pa midi e tendensianan di mas resien riba merkado laboral, manera sifra di desempleo, nivel di partisipashon, e kantidat di habitante ku tin trabou i e kantidat ku ta buskando trabou.
For di 2017, Kòrsou a bin ta eksperensiá migrashon negativo, ku otro palabra, tin mas tantu hende ta bandoná e pais ku tin ta drenta. E tendensia akí a keda reflehá den e sifranan laboral registrá na 2018. Den e aña ei, por a mira bahada den tur e diferente státusnan laboral: e grupo empleá, e grupo desempleá i e poblashon ekonómikamente inaktivo.
Merkado laboral, ku ta konsistí di poblashon empleá i desempleá, a baha di 73.147 te 70.153. Esei ta un bahada di 2.994 persona. Si wak sifra apsoluto, e poblashon empleá tabatin e bahada di mas grandi; sin embargo, e grupo ku a sinti e impakto mas grandi ta e poblashon desempleá. E grupo akí a baha ku 8,6 punto porsentual, di 10.313 na 2017 te 9.424 na 2018. Den merkado laboral por mira un bahada den sifra di desempleo, di 14,1 porshento na 2017 te 13,4 porshento na 2018.
Aunke den pasado tambe e personanan enkuestá a kontestá ku e motibu prinsipal ku nan ta desempleá ta ku ekonomia ta malu, awor e porsentahe di esnan desempleá ku ta duna e kontesta akí a subi di 34,6 te 52,2 porshento. Esei ta indiká un malkontentu kresiente tokante ekonomia i merkado laboral. Na mes momento, e ta un indikadó tambe di e tendensia di migrashon negativo.
Ora emigrashon ta subi i inmigrashon ta baha, esei ta un señal di malkontentu. Malkontentu ta pone ku hende ta bandoná e isla pa bai buska trabou otro kaminda, òf keda sin bin biba riba e isla ya ku no tin trabou.
Serka hende hòmber, desempleo a baha mas tantu, di 12,9 pa 11,3 porshento. Desempleo di hende muhé a keda práktikamente meskos, ku un oumento masha chikitu di 0,2%, di manera ku awor e ta na 15,4%. Esei por tin di aber ku tamaño di e dos gruponan akí. E poblashon di hende hòmber desempleá a baha ku 14 punto porsentual, na mes momento ku e poblashon di hende muhé desempleá a baha ku 4,6 punto porsentual.
Desempleo di hóben ta sigui mehorá. Awor el a baha te 29,3 porshento. Esei ta su nivel mas abou di e último sinku añanan.
CBS ta gradisí tur e kasnan di famia ku a kontribuí na éksito di e enkuesta akí.
Riba e página inisial di CBS su website (www.cbs.cw), bo por tene bo mes na altura di tur e enkuestanan di CBS ku ta andando i di e resultadonan di enkuesta ku CBS ta publiká, inkluso tur tabèl ku e resultadonan di Enkuesta di Forsa Laboral 2018.

Comments

comments