Hopi departamento di Gobierno ta traha cu placa cash ora di duna servicionan pa cual di parti Sindicato Seppa ta spera cu pronto Gobierno pone mas siguridad pa e trahado publico segun Magaly Brito.
Insiguridad por ta na pia di trabao, por ta den diferente tereno. Uno ta esun kisas na prome instante cu ta pensa riba dje ta esnan cu ta traha cu placa. Naturalmente pa traha cu placa, apart di e proceduranan cu mester por traha of funciona cu placa, of atende cu placa, tin otro dentro di e proceduranan cu tambe mester regla pa tin siguridad na pia di trabao, siguridad visibel, tin esnan cu ta bin cu cualkier otro intencion malo, por reconoce cu tin autoridad na pia di trabao. Cu eynan no ta un caminda cu bo ta bay yega facilmente y comete actonan criminal of actonan cu por bay contra e hende cu ta laborando.
Di un otro banda tin otro partinan di siguridad tambe cu por ehempel hendenan eyfo, na un parti di Sociale Zaken, por haya hendenan cu ta atende cu un Departamento di Labor, un DPL, hendenan cu ta haya nan cu clientenan cu ta bin cu reclamo, tin biaha cu actitudnan violento, kier resolve asuntonan na un manera diferente y esey ta haci cu e hendenan tambe por sinti nan mes insigur. Tur e temanan aki a plantia na diferente minister y ta exigiendo siguridad na pia di trabao, pa tin muestra di autoridad, muestra di control, muestra di cualkier infraccion bo ta wordo atendi debidamente, pasobra tampoco no por ta asina manera cu ta bisa cu un hende ta comete acto contra un empleado publico, bo ta djis hala su atencion y e la bay. E empleado publico ey ta keda cu su trauma y den caso di atraco, ta mesun cos. Tin diferente forma di atende cu e problema di insiguridad, pero pa cada un mester atende esakinan naturalmente. Pone medionan disponibel pa bo por ehecuta nan. Tin caminda cu mester por bin hasta cu locual cu ta bisa bentananan di glas cu ta proteha e trahadonan y esey ta un deficiencia si, segun Brito, den e aparato publico. Pero a mustra Gobierno riba e problema aki. Awor aki cu poco poco e ta un lastima si, cu ta bin mas atraco of indicacion di atraco, of indicacion di hendenan arma cu tin pensamentonan menos bon. Esey ta enforsa e ponencianan cu lo por a trece cada biaha na mesa, segun Brito. Ta trec’e y ta reconoce e problema, pero parce cu no ta bin como prioridad.