E parti di drenta Parke Nacional Arikok ta facil y esaki ta un preocupacion grandi cerca w trahadornan cu ta sinti cu mester pone mas siguridad na e entradanan di e parke.
Segun secretaria general di Seppa, Magali Brito, pa drenta parke ta hopi facil, manera menciona. Mester di un halfboom por ta pa cera tur e posibilidadnan aki y esey tambe a wordo papia y palabra. Awor aki ta wak un poco a bin, pero e no ta completo. Esey ta loke ta indica cu e directiva ta mira cu berdad a corto plazo, nan mes como parke por percura pa e acceso facil na parke ta wordo limita of elimina completamente.
E tema di siguridad na e momentonan aki loke tin ta companianan di siguridad cu lo ta percura pa cierto momentonan ta y eynan pa por yuda e hendenan aki y tambe pa transporta e placa na momento di cobramento. E camaranan, na luganan strategico y atrobe pa tin control riba esakinan tambe pa wak kendenan ta drenta.
Pa loke ta trata mas siguridad di personanan cu ta atende como siguridad na pia di trabao, esey ta un evaluacion cu e directiva lo bay haci awor aki pa wak dentro di nan presupuesto kico nan mes por carga y kico nan por acerca Gobierno riba esaki. Ta lastimamente no solamente parke, pero tur e fundacionnan ta den un insiguridad tambe, kico ta bay bira nan situacion den futuro, mirando cu Gobierno kier trece cambio riba e areglo di subsidio. E ora ey ningun hende, ningun fundacion ni directiva, na e momento aki kier compromete nan mes mas aleu di e compromiso cu nan tin pa cu e trahado y organisacion. Esey ta un obstaculo hopi grandi cu Seppa ta kere cu e directiva di parke y tur otro directivanan, mester por cera cabes y atende e asunto aki cu e Gobierno y mira con por elimina e sentimento di insiguridad pa loke ta trata e presupuesto, e subsidio cu ta un situacion cu ta bay presenta segun rumornan dia 1 di Januari 2017, segun Brito.