Maestronan di cada scol basico di Aruba a participa den un training den cuadro di e introduccion di e asina yama “Kerndoelen Project” pa scolnan basico. Esaki a wordo introduci na Aruba pa e periodo escolar di aña pasa y awor e maestronan ta hayando un “refresh”. Henry Barrera ta docente na Pius X School den Klas 6B y e ta un di e maestronan cu a atende cu e training. El a laga sa cu e ta hopi feliz cu e workshop aki. Aña pasa taba tin e Nationale Toets y e biaha aki por a nota e resultado nan y analisa esaki conhuntamente.
E maestronan ta masha contento cu e resultadonan y ta mira varios cos cu por mehora pa futuro. Pa loke ta e KerndoelenWorkshop, el a indica cu esaki tabata hopi bon organisa y por a mira un tremendo samenwerking. Di awor pa dilanti ta bay ripara unda como scol tin cu bay purba traha na dje. El a agrega cu e ta kere cu esaki lo bira un punto cu prioridad riba nan agenda.
Banda di esaki Marie Therese Croes, Juffrouw na Princes Amalia Basisschool na Klas 4 a señala cu e workshop aki tabata hopi importante pa repasa loke a trece dilanti aña pasa, ora a introduci’e y e aña aki a bay den profundidad.
E aña aki tin metodonan nobo den nan Rekenen y ta analisa kico e kerndoelen ta haci compara cu e metodo anterior. For di e workshop aki, a bisa, nan a siña hopi con pa anda cu e metodo nobo den nan klas. “Esaki ta yuda pa crece tambe. Ta hopi great”, Marie Therese Croes a duna di conoce.