CARACAS, Venezuela- E voto di Venezuela no ta obligatorio, segun constitucion. Sin embargo, e president Venezolano a obliga tur empleado publico, sin excusa, pa nan bay vota den e eleccionnan di e Asamblea Nacional Constituyente dia 30 di Juli proximo.
E mandatario a anuncia e obligacion di companianan estatal pa participa na e votacion durante un asamblea cu e trahadonan di e sector minero y metalurgico, realisa den e ciudad di Guayana, den e estado Bolivar. Esaki a wordo transmiti en directo via cadena oficial di radio y television.
“Boso scuchami bon. Hector Rodriguez, hefe di comando di campaña, tuma e salarisslip di tur e institucionnan, empresanan y ban organisa nos mes desde awo caba”, Maduro a exigi. El a propone, pa por cumpli cu e tarea aki, pa forma “comitenan constituyente”, cu ta permiti di sigui cada empresa.
E president Venezolano a haci un apelacion fuerte na e funcionarionan pa nan vigila e concurencia di e empleadonan.”Yama tur e trahadonan publico, yama tur esunnan cu tin e carnet de patria y organisa e forma con lo bay vota pa 5 or di mainta, diadomingo 30 di Juli, den grupo.
El a sigui bisa, pa tur funcionario, na final di dia, revisa e registro. Si nos tin 15 mil trahado, tur 15 mil mester bay vota, sin ningun excusa, empresa pa empresa, ministerio pa ministerio, gobernacion pa gobernación, alcaldia pa alcaldia”, Maduro a ordena.
E sector publico Venezolano tin un registro di 2.5 miyon empleado. Riba esaki mester pone e mas di e 500 mil cu ta integra e milicianan arma, e becadonan di e misionnan of programanan social, empresanan estatal, cual pago ta depende financieramente di e Presidente di e Republica.
E anuncio di Maduro pa obliga e hendenan pa vota den e eleccionnan a intensifica e protestanan, cu ya caba tin mas di tres luna, cu a pone e regimen den jaque mate. Aunke cu e represion ya caba a cobra bida di 91 Venezolano, e manifestacionnan no a disminui.
Di otro banda, oposicion ta avansa cu nan mesun eleccion pa puntra e Venezolanonan di nan ta desea of no e Constituyente di Maduro. Dia 16 di Juli proximo e aliansa opositor Mesa di Unidad Democratico (MUD), hunto cu otro sectornan di e sociedad civil, lo realisa e votacion di nan mes.
Segun e lider opositor y gobernador di Miranda, Henrique Capriles, e eleccion aki di MUD lo por saca mas o menos 10 miyon voto, procedente di e personanan cu ta desea un cambio di gobierno, y asina dicidi riba nan futuro.
Fuente: www.clarin.com