Internacional: Presidente Nicolss Maduro a gana e eleccion di diadomingo awor na Venezuela cu 5.150.092 voto, 51.20% di e total, asina e presidente di Conseho Nacional Electoral (CNE) Elvis Amoroso a informa den un rapport di resultado cu, el a bisa, a refleha 80%.
Cu e resultado aki, Maduro ta wordo re-eligi pa di dos biaha y lo cuminsa un di tres periodo na cabes di e ehecutivo, cu lo extende di januari 2025 pa januari 2031.
Nomina pa e Partido Socialista Uni di Venezuela (PSUV) na mando, Maduro a surpasa na e urnanan e candidato principal di oposicion, Edmundo González Urrutia, di e Plataforma Unitaria Democrata (PUD), cu a obtene 4.445.978 voto, of 44,2% di e total.
E triunfo di Maduro ta representa e continuidad di Chavismo na poder, cu a bin na 1999 na man di Hugo Chávez. Na 2013, despues di morto di Chávez, Maduro a asumi un posicion for di cual e no a sali for di e tempo ey.
E resultadonan di diadomingo awor no tabata pronostico pa e encuestanan. Un midimento di ORC na Juli a indica cu Gonzalez Urrutia tabatin 59.68% di e intencion di vota compara cu Maduro su 14.64%.
Chavismo semper a rechasa e pronostico aki y a sigura cu nan tabata parti di un campaña cu e meta pa prepara e tereno pa reclama fraude unabes cu Conseho Nacional Electoral a duna e resultadonan.
Apesar di e cifranan aki, Maduro a declara su mes sigur di gana y mantene su proyecto gubernamental.
