CARACAS, Venezuela – E presidente di Venezuela, Nicolas Maduro, a indica diamars cu e sancionnan cu ta aplica e Departamento di Tesoro di merca, contra e vicepresidente di Republica, Tareck El Aissami, kende a wordo acusa di ta presuntamente vincula den negoshi cu droga cu “ilegal y inaudito.”
“E dia di ayera mi a wordo informa di e decision ilegal, inaudito y infame cu nan a haci contra e compañero Vicepresidente Ehecutivo, Tareck El Aissami. Sin luga na duda ta un agresion cu Venezuela lo responde paso pa paso cu ekilibrio y contundencia,” e hefe di Estado a indica.
Durante e prome plenario di e aña aki di e Conseho Federal di Gobierno, celebra desde e salon Ezequiel Zamora di e Palacio Blanco, na Caracas, a manifesta cu lo activa tur e mecanismonan legal, nacional y internacional pa contraaresta “e infamia aki” y defende e derechonan humano di e Vicepresidente Ehecutivo.
“Mi a ordena e canciyer, Delcy Rodriguez, kende a cita e encargado di negoshi di Merca na Venezuela y entrega un nota di protesta pa mi aclarea y ta retracata di e acusacionnan grave cu nan a haci na e Vicepresidente Ehecutivo y ademas pidi disculpanan publico,” el a señala.
Den e mesun liña aki, a agrega cu El Aissami ta e prome cu a lucha contra narcotrafico na Venezuela. “Tareck a logra cu Forsa Arma Nacional Bolivariano declara na Venezuela teritorio liber di cultivonan ilicito y di produccion di droga, cu henter mundo mester sa.”
Di un otro parti, den transmision conhunto di radio y television, e prome mandatario a aproba 557.865 miyon di bolivar pa financia 13.361 proyecto di desaroyo di obranan publico. “E aña aki nos tin un aumento pa inverti y financia obranan publico,” el a bisa.
“Si akinan tin un Gobierno oligarco y “di derecha” no lo ta fluyendo e recursonan di manera transparente pa e proyectonan di interes di pueblo. Solamente e revolucion por hiba na e patria aki pa paz y e integracion y union nacional,” el a puntualisa.
Fuente: El Universal