NEW YORK, Merca- Presidente Venezolano, Nicolas Maduro, den su discurso awe den e Asamblea di Nacionnan Uni, a condena su homologo Mericano, Donald Trump, pa e “atake infame y bochornoso” contra di Venezuela cu el a haci den su discurso di diamars, y pa “defende” e doctrina Monroe den e foro aki.
“Awe Venezuela ta victima di un agresion permanente, en lo politico, mediatico di parti di Merca. Nan ta uza e doctrina Monroe pa hustifica desde e punto di bista ideologico e agesion contra nos patria stima, Maduro a bisa den su discurso den e Asamblea General di ONU.
E Doctrina Monroe di 1904 tabata atribui derechonan unilateral di Merca riba Latino America y ta asocia esaki den e continente cu e historia imperialista di Merca den e region.
Durante su discurso di diamars, Trump a bisa: “ta e politica formal di nos pais desde Presidente Monroe cu nos ta rechasa e interferencia di nacionnan stranhero den e continente aki y den nos mesun asuntonan”.
“Esaki ta un conflicto bieu, un contradiccion bieu, entre un doctrina cu ta pretende domina nos region”y esun cu Venezuela ta defende, Maduro a indica.
“Den siglo XXI nan ta pretende di sigui goberna, duna mundo ordo como si fuera e ta di su propiedad, den nos region e conflicto aki tin 200 aña”, el a agrega.
Den su discurso diamars den ONU, Trump a pidi e nacionnan di e organismo pa nan yuda Merca pa “yama na restaura e democracia na Venezuela” y a califica di “tragedia humano” loke ta pasa den e pais ey.
Trump a responsabilisa “socialismo” di e “quiebra di un nacion rico den petroleo”, y a yama mundp na resisti e doctrina politico aki cu ta trece “sufrimiento, corrupcion y decadencia”.