CARACAS, Venezuela- Presidente di Venezuela, Nicolas Maduro, a anuncia e reconversion monetario nobo cu lo kita cinco cero for di e Bolivar, na luga di tres cu a wordo anuncia prome cu eleccionnan presidencial.
Maduro ta sostene cu e Bolivar Soberano nobo lo tin un modelo mara na e Petro “pa stabilisa e sistema financiero di e pais”. E medida lo drenta na vigor pa dia 20 di augustus proximo.
El a splica cu e decision di kita cinco cero na e moneda a wordo realisa cu e obhetivo di duna un golpi duro na e mafianan cu “a hiba” e Bolivar pa Colombia, “nos ta kima e mafianan”, el a sentencia.
El a anuncia tambe cu e lo bin cu’n proyecto di ley den e Asamblea Constituyente tocante sistemanan cambiario ilegal y asina elimina barreranan pa permiti e fluho liber di divisa y inversion cu e pais tin mester.
“Mi no tin miedo di debate, pa duna un cambio, un vuelta total na e materia aki”, Maduro a bisa.
E mandatario a decreta tambe e exoneracion di invoerrechtenan pa un aña na importacionnan priva cu trece materia prima, makinaria, etc. E obhetivo di e medida ta pa “acelera e crecemento economico di e pais”.
Un di e otro anuncionan presidencial realisa durante un transmision na radio y televisio, ta e entrega di un Blok di Reservanan Petrolero di e pais pa wordo maneha directamente door di Banco Central di Venezuela. “Pa garantisa y respalda” e emision di bononan y rol cu e institucion ta realisa.
Por ultimo, Maduro a anuncia e activacion di un censo nacional di Transporte. El a indica cu e censo aki lo ta pa transporte publico y priva, di tur clase (brommer, taxi, bus y transporte di carga).
Obhetivo di e censo aki ta e desaroyo di un miho politica di atencion na e sector, “nos lo activa e carnet de la Patria pa e sector publico”, el a remarca.
“Nos lo drecha e poder di compra di e nacion”, Maduro a agrega, un dia despues di cu e Fondo Monetario Internacional a pronostica cu e inflacion den e pais aki lo yega 1 miyon por ciento.
Na Venezuela ta existi un control di cambio desde 2003 cu ta laga e compra y benta di divisas exclusivamente den man di estado. Esaki ta un medida cu economistanan a critica y a señala cu esaki ta un di e factornan causante di e crisis economico severo cu Venezuela ta pasando aden awendia, den un scenario di hiperinflacion.