Aisla pa e alarmante crisis financiero, Nicolas Maduro diadomingo a anuncia e creacion di e “Petro”, un moneda virtual respalda pa su rikesa petrolero. Obhetivo di esaki ta pa enfrenta e “blokeo financiero” di Merca.
“Mi kier anuncia cu Venezuela lo implementa un sistema nobo di criptomoneda e reservanan petrolero. Venezuela lo crea un criptomoneda, Petro, pa avansa den materia di soberania monetario, pa haci su transaccionnan financiero pa vence e blokeo financiero”, según Nicolas Maduro, presidente di Venezuela durante su programa di tur diadomingo.
“Esaki lo permiti nos di avansa pa formanan nobo di financiamento internacional pa e desaroyo economico y social di e pais”, el a agrega.
E mandatario Chavista a detaya cu su gobierno lo haci un emision di criptomoneda, respalda pa e reservanan di rikesa Venezolano di oro, petroleo y diamante”.
E anuncio ta bin na momento cu Venezuela ta confronta problemanan serio di financiamento, despues di cu un grupo di acreedornan y calificadonan di risico a declara e pais den default parcial, hunto cu su compania estatal PDVSA pa pagonan atrasa di capital y interes di bononan di debe.
Maduro ta atribui e dificultadnan na e sancionnan impone door di Merca na Augustus, cu ta prohibi su ciudadanonan y entidadnan di e pais aki pa yega na un areglo pa e debe di Venezuela y PDVSA.
Mei mei di e crisis grave cu e pais ta padece pa e caida di e prijs y produccion di petroleo, e moneda Venezolano, bolivar, a cay cu 95,5% contra di e dollar negro den e ultimo aña.
Pa e miyones di Venezolano cu a cay den pobresa y ta pasa trabao pa come tres cuminda pa dia, e anuncio di Maduro lo no trece ningun speransa inmediato pa nan situacion.
Fuente: https://www.reuters.com