CARACAS, Venezuela – E presidente Venezolano, Nicolas Maduro, a sigura diadomingo cu tabata tin un “migracion en masa” pa Venezuela di Colombianonan cu a huy debi na e conflicto arma cu a afecta e pais aki.
“Aña pasa a drenta 100 mil compatriota Colombiano den Venezuela for di Colombia (…) Nos a ricibi un migracion en masa na e frontera, producto di e guera civil di Colombia,” e mandatario a afirma den un manifestacion pa e conmemoracion di e Dia di Hubentud di Venezuela.
Maduro a bisa cu tin varios rason pa loke e Colombianonan ta prefera biba na Venezuela unda, el a afirma, a wordo ricibi cu “brasanan habri.”
“E rason fundamental, economico, buscando un oportunidad; esun social, pasobra na Venezuela nan yiunan tin educacion gratuito desde cu nan nace te ora cu nan gradua, pasobra na Venezuela por haya unda pa biba,” el a accentua.
E presidente a informa cu e ta en contacto permanente cu Francisco Arias Cardenas, gobernador di e estado Zulia (nort) fronteriso cu Colombia, pasobra den e ultimo dianan via un solo punto a drenta 359 Colombiano den Venezuela.
“Esey ta e berdad, apesar di e campañanan sushi cu tin na Bogota. Imagina boso si nan papia bon (di Venezuela), no solamente lo bin 100 mil Colombiano, un miyon lo bin,” Maduro a afirma.
Entre e Gobiernonan di Venezuela y Colombia a desata un incidente diplomatico desde dia 26 di Januari, ora cu den un bishita na e municipio di Tibu (departamento fronteriso den nort di Santander, den e parti nort di Colombia) e vice presidente Colombiano, German Vargas Lleras, a bisa cu un programa Gubernamental di vivienda gratis no tabata pa “venecos.”
Maduro, e canciyeria Venezolano y dirigentenan halto di e oficialismo, como e diputado Diosdado Cabello, a rechasa e apelativo di “venecos”, cual a tild’e di “xenobo.”
Cabello a insulta Vargas Lleras pa esey, mientras cu Maduro a pone e apodo di “señorito oligarca,” loke a genera di un banda un nota di protesta di canciyer di Colombia, Maria Angela Holguin.
“Na Colombia mester sa, nan sa, cu no tabata tin un acuerdo cu Farc sin e base solido di e revolucion Bolivariano y no lo tin paz si lo destabilisa e revolucion Bolivariano,” Maduro a adverti.
Fuente: El Colombiano