Internacional: Presidente Nicolas Maduro a comparti un mensahe riba su canal di Telegram diadomingo tocante loke e ta yama “agresion” y “colonialismo” di parti di Merca. Den dje, e mandatario ta afirma cu e pais Caribense no ta ricibi “pedidonan na ingles” mas.
Referiendo na e recien revocacion di permiso di parti di Merca pa e companianan multinacional Repsol, Maurel & Prom, y Eni, cu lo tin te cu mei pa opera na Venezuela. Esaki, despues di dos aña di licencia danki na e administracion di Joe Biden.
Como contesta, Maduro a rechasa e accionnan di e administracion di Donald Trump. “Venezuela ta un pais liber. Nos no ta un colonia di niun hende. Niun hende no ta bin insulta nos, pa rebaha nos, niun hende no ta niun hende. No, e tempo ey a caba! E tempo cu nan a insulta nos y a duna ordo na e pais na ingles,” el a bisa.
“Nos mensahe semper tabata cu nos lo tin relacionnan di respet, cooperacion y comunicacion, pero einan, nan a dicidi di ataca henter mundo. Ayanan, nan ta esnan cu ta perde nos tabata ke tin relacionnan civilisa di respet. Pasobra no ta Maduro, ta un pueblo determina pa ta liber,” e mandatario a bisa.
