CARACAS, Venezuela – E presidente di Venezuela, Nicolas Maduro, a anuncia diadomingo un incremento di 60 porciento riba e salario minimo, buscando di proteha e trahadonan di un inflacion cu, segun calculonan di organismonan multilateral, ta e mas halto di mundo.
E sueldo minimo nobo mensual lo ta di 65.021 bolivar desde dia 1 di mei.
Sin embargo, e ingreso ta ekivale di apenas 14 dollar riba e tasa di mercado paralel, loke ta convirti’e den esun di mas abao di Latino America.
E oposicion di Venezuela ta acusa Maduro di ta e principal responsabel di e crisis grave economico cu ta afecta e pais cu e mayor reservanan di crudo di e planeta, di loke a inicia un ola di protesta cu a laga mas di 30 hende morto.
E mandatario socialista, di su banda, ta sigura cu e administracion ta victima di un “guerra economico” cu tabata busca di bah’e.
Venezuela no a reporta su indicadornan economico desde dia 2016, pero e calculonan di Fondo Monetario Internacional (IMF), ta adverti cu e inflacion ta cera e aña aki na 720 porciento.
Sumando na 135 mil bolivar di bononan di alimentacion cu e trahadonan ta ricibi, e ingreso integral a aumenta na 200.021 bolivar.
Fuente: Reuters