MADEIRA, Portugal- No sa cu exactitud cuanto, pero autoridadnan di Madeira a calcula cu casi 6 mil Venezolano di descendencia Venezolano, cu a busca refugio na e isla, ta yega cu loke nan tin bisti y den condicionnan di carencia extremo.
“Nan ta bin sin nada, hopi ta malo, nan ta personanna cu carencianan grandi”, e presidente di e Archipielago Luso, Miguel Albuquerque a declara.
Nan ta Portuguesnan di segundo y di tercer generacion, descendiente di esunnan cu decadanan atras a bandona Madeira buscando un miho bida na Venezuela y awo e trayecto ta bayendo net robes.
Aura Rodríguez, representante di e organisacion Venexos, un di esunnan cu ta yega e Venezolanonan pa int3egra na e isla, a splica cu ta dificil pa bisa cuanto a yega ya cu algun a drenta Europa via Madrid.
“Hopi di esunnan cu ta yega aki, ya caba tin registro na Europa, na Madrid, pa cual na Madeira nan no tin niun identificacion”, el a agrega.
Riba e isla di su antepasadonan “nan tin acceso na siguridad social y nos ta apoyando nan den e educacion”, e presidente a bisa, cu a precisa cu esunan cu ya caba ta inscribi den e sistema regional di salud, “hopi di nan tin malesanan serio, oncologico y cardiovascular”.
Nan ta ricibi yudansa tambe den e instituto di empleo, entidad a trabes di cual “ya caba nos a yuda casi 3 mil”, pero “awo tin tambe e problema di vivienda”, el a agrega.
Tin organisacionnan humanitario y social, manera Venexos, cu ta purba yuda “aunke cu e carga mas grandi ta pa gobierno, cu ta apoyando y lo sigui apoyanan” e situacion aki, ya cu e.o., nan ta “nos concuidadanonan”, Albuquerque a subraya.
Den e ambito di educacion, el a bisa cu “e mayoria ya no ta papia Portugues mas”, pa cual ta dunanan les di Portugues y Ingles, pa despues busca trabao pa nan den e sector turistico, e principal motor economico di e isla.
“Te unda mi sa, Portugal no a ricibi e apoyo priminti door di UE.. hopi promesa pero nada”Aura Rodriquez a bisa.