Campeonato HEINEKEN fast pitch di Aruba Softball Bond a continua riba veld di Flatstone. Den categoria AA e dos ekiponan cu ta bringando pa un oportunidad pa drenta playoff na di cuater puesto a faha cu otro todo por todo. Den e prome partido di anochi e ekipo di Balashi Premuim ta saca bentaha derotando Macuarima 5-2. Balashi 5 careda, 10 hit, 0 eror. Macuarima Indians 2 careda, 5 hit, 1 eror. E hoben pitcher Giancarlo Gomez ta bay henter e ruta regalando solamente 1 base por bola poniendo e victoria riba su nomber mientras e veterano Lucio Geerman ta regala 3 base por bola cu 2 hit by pitch ta resulta pitcher perdedo. Miho bateadornan pa Balashi Premuim ta Sando Geerman 3-3, Filbert Thiel 2-2, Jorge Santana 2-1, Josmar Thiel, Djurwin Croes, Christopher Rasmijn y Nathan Berkel tur a bay di 3-1. Pa Macuarima Indians a destaca na plato Jose Luis Gonzalez, Ryan Richardson, Brandon Angela y Lucio Geerman tur a bay di 2-1, Robertino Koolman di 3-1. Mesora a continua cu e di dos partido di anochi complementando asina nan double header. Akinan Macuarima asabiendo e importancia di e wega aki a bringa te final pa logra saca un victoria importante di 7-6 riba Balashi. Macuarima Indians 7 careda, 4 hit, 2 eror. Balashi Premuim 6 careda, 6 hit, 0 error. Pitcher ganador a resulta Benjamin Geerman ricibiendo relevo di su “uncle Lucio Geerman” den di 5 inning. Jorge Santana ta bay cas cu e derota ricibiendo relevo di Giancarlo Gomez den di 4 inning pero finalmente Jorge Santana mes ta drenta bek pa termina e partido. Macuarima ta regala 6 base por bola mientras Balashi ta regala un total di 8 base por bola. Miho bateadornan di Macuarima Indians ta Leander Angela 3-2, Albertico Noguera 2-1 y Edgar Flanegin di 1-1. Pa Balashi a destaca na plato den causa perdi Filbert Thiel 2-2, Sando Geerman y Juan Davis Arango ambos di 2-1, Gian Mark Alders di 3-1 y Djurwin Croes di 4-1. Softball fast pitch drentando e etapa final unda tur ekipo den e proximo siman lo ta yegando nan di 24 wega hunga pa asina determina cual ta e prome cuater ekiponan cu lo drenta playoff. Weganan di campeonato lo continua diaranson awor pa 7:15pm na Kudawecha unda Mariners lo midi forsa contra Pizza Hut Monsters. Diahuebs 1 di September pa 8pm na Flatstone Final Touch lo enfrenta Blackhawks. Campeonato fast pitch a la carga!!!!