PARIS, Francia – E presidente di Francia, Emmanuel Macron, a sigura den un conferencia di prensa, hunto cu su homologo Ruso, Vladimir Putin na Paris, cu e “uzo di armanan kimico na Siria, lo ricibi un respuesta inmediato” di su pais, di acuerdo na un reporte di e Agencia AFP.
“Ta existi di nos parti un liña cora hopi cla, e uzo di armanan kimico, pa ken cu e por ta. Cualkier uzo di armanan kimico lo ta obheto di represalia y di un respuesta inmediato, en todo caso di parti di e Francesnan,” e mandatario Frances a bisa bon cla.
Sin embargo, tambe el a expresa su interes di reforsa “e colaboracion cu Rusia,” specialmente den e materia di lucha antiterorista na Siria.
“Nos prioridad absoluto ta e lucha contra terorismo y e eradicacion di gruponan terorista y en particular Daesh,” Macron a agrega.
Di su parti, e presidente di Rusia, Vladimir Putin, a responde na un pregunta haci pa un periodista cu e “sancionnan” contra su pais no ta contribui en absoluto na soluciona na e crisis Ucraniano.
“Nan a puntrami con e sancionnan contra Rusia ta yuda soluciona e crisis oost di Ucrania Y esaki ta e respuesta: den ningun manera.”
Riba e lucha contra terorismo, el a bisa cu ta necesario “uni esfuerso” y centra mas den e puntonan di acuerdo cu den e diferencianan ta existi entre ambos, segun un reporte di e Agencia EFE.
Macron a saluda dialuna su Homologo Ruso Vladimir PUtin den e palacio di Versalles, pafo di Paris, den su prome encuentro bilateral.
Fuente: www.ntn24.com