Segun un investigacion nobo realisa pa cientificonan di e Scol di Salud Publico Harvard TH Chan (Merca) publica den e revista specialisa Environmental Health Perspectives, e muhenan cu ta biba den areanan urbano cu contaminacion halto luminico y specialmente esnan cu ta traha den wardanan di anochi, tin un mayor riesgo di sufri cancer di pecho.
Segun Peter James, autor principal di e estudio a splica, “den e sociedad industrialisa aki, iluminacion artificial ta practicamente ubicuo. Nos resultadonan ta sugeri cu e exposicion amplio aki na luz artificial durante oranan nocturno por representa un factor di riesgo nobo pa cancer di pecho.” No ta e prome estudio cu ta afirma cu e luz por tin efectonan prehudicial pa nos. Investigacionnan previo ya a sugeri cu expone na luz artificial durante anochi, ta contribui na baha e nivelnan di melatonina, loke, den consecuencia, ta altera nos ritmonan circadiano.
Pa yega na e conclusionnan aki, cientificonan a studia den profundidad 110 mil muhe durante 24 aña (1989-2013): unda nan tabata biba, si nan tabata haci warda anochi, nan estado di salud y tambe nan nivel socio economico. Tabata asina con e investigadonan a detecta e muhenan cu tabata biba den zonanan cu contaminacion halto luminico, tabata tin alrededor di 14% mas di riesgo di padece cancer di pecho cu esnan cu tababata biba den zonanan menos ilumina. Tin cu señala cu e efecto aki solamente a ordo detecta den muhenan humado, ex humado y premenopausico.
Segun investigadonan ta splica, ta probabel cu e mayor riesgo ta pa e muhenan cu tabata traha den warda di anochi, a consecuencia cu e turno laboral aki y e luz artificial, ta influencia den e ritmo circadiano, loke ta faborece e aparicion di cancer di pecho.
Fuente: http://www.quo.es/