“E ta un forma pa nos hisa e conscientisacion di e rol importante cu nos enseñansa ta hunga na e desaroyo di nos pais. Tambe e meta ta pa pone luz riba esunnan cu mas ta resalta den e trabou di educador”, asina Minister Michelle Hooyboer-Winklaar a duna di conoce. E eventonan ta cuminsando desde dialuna dia 3 di October y lo continua te cu fin di luna.
E prome evento lo ta un “STEAM (Science, Technology, Engineering, Art & Mathematics) camp” entre dia 3 pa 7 di October for di 9:00am pa 12:00pm na International School of Aruba. E camp ta special pa 60 mucha local entre 9 – 12 aña. Tur mucha cu ta participa ta di scolnan di diferente bario di Aruba (no di ISA) e programa ta conta cu sosten di Maestronan di scolnan local y tambe di ISA.
Diamars dia 4 di October ta tuma luga “Tablet Café” entre 9:00am pa 12:00pm na Biblioteca Nacional situa den George Madurostraat.
Dia 5 di October proximo ta Dia Mundial di Maestro, un oportunidad pa refleciona riba e trabou importante cu ta wordo haci.
Cerando e prome siman Di Luna di Enseñansa, diabierna dia 7 di October tin “Storia y mas” entre 9:00am pa 12:00pm na Neptali Henriquez Park, organisa dor di Fundacion Bon Nochi Drumi Dushi hunto cu studiantenan di IPA.
Cada siman lo organisa un variacion di actividad pa studiante, docente y mayor. Por ehempel diferente workshop pa Maestronan, un concierto/documentario special di Levi Silvanie pa mas cu 1000 hoben yama “Superando”, screening di e documentario “He named me Malala”, y un charla pa mayor duna pa Tienda di Educacion.
Pa haya mas informacion di e luna completo por bishita www.ea.aw of Facebook @EducationMonthAruba.