PARIS, Francia- E futbolista Croata di Real Madrid dialuna a keda galardona cu e Bala di Oro 2018 durante cu gala cu a wordo celebra na Paris (Francia).
E futbolista Luka Modric a gana e Balon D’Or 2018, un premio cu pa prome biaha ta wordo gana pa un futbolista Croata y cu ta kibra e racha di ganadonan manera Cristiano Ronaldo y Lionel Messi.
Concretametne, ta e prome biaha den un decada cu e revista France Football a entrega e premio aki na otro futbolista cu no ta e astro Argentino of e ‘crack’ Portugues.
E sub campeon di mundo a sobresali den e disputa cu Ronaldo y dos otro finalista: e Francesnan Antoine Griezmann y Kylian Mbappé, hungadonan di e seleccion campeon di mundo na Rusia. Despues di a ricibi e premio, e centro campista a wordo felicita pa e presidente di su pais, Kolinda Grabar- Kitarovic.
Messi, di su banda, a keda na di cinco luga pa France Football, cu ta prome biaha desde 2006 cu e astro Argentino no ta figura entre e tres miho futbolistanan den e ranking aki.
Pa prome biaha na un muhe
E Balon D’Or, un premio tradicionalmente masculino, a wordo entrega e aña aki pa prome biaha den historia na un muhe, e Noruego Ada Hegerberg, delantero di 23 aña di e Olympique di Lyon y e actual ganado di e Liga di Campeon cu e ekipo Frances.