Recientemente e hoben Luis Villegas a entrega 2 copia di su publicacion mas recien na sra. Des Croes di departamento Arubiana/Caribiana di Biblioteca Nacional Aruba. E titulo di e publicacion ta “Estructuras de Estadia Temporal”. E publicacion aki ta e resultado final di Villegas su residencia artistico na e ciudad di La Plata den provincia di Buenos Aires, Argentina, cu apoyo di UNOCA. E publicacion ta trata temanan di identidad personal cual ta captura e esencia di crece riba e isla despues cu mayornan ta dicidi di emigra di nan pais pa establece nan mes na Aruba. Villegas ta describi su publicacion como “un investigacion di derechonan humano pa nacionalidad y estudio unda e Gobierno di un pais ta neglisha un parti importante di su poblacion.”
Den esaki e ta toca e tema cu, segun Villegas, ta wordo evadi den e discurso publico, esta di “hobennan cu a wordo perhudica door di Departamento di Integracion, Maneho y Admision di Stranheronan (DIMAS) pa por sigui nan estudio na Hulanda of otro paisnan den exterior.”.
Villegas ta presenta esaki den un contexto di arte contemporaneo y multidisciplinario, unda cu ilustracion, arte di palabra, fotografia y entrevistanan cu otro hobennan afecta pa e problema cu DIMAS a crea ta bin hunto pa conta e storia di un generacion cu no ta vocifera nan malcontento cu un burocracia indiferente.
E buki ta na benta na Artfama, cual ta situa na fin di caya grandi y Villegas ta encurasha e publico pa pasa na Artfama of Arubiana unda cu por tira un bista na su publicacion.
E contribucion boluntario aki di parti di Villegas ta cuadra cu e vision di departamento Arubiana/Caribiana pa un of dos copia di cada publicacion traha na Aruba of cu ta trata di Aruba ta warda y registra den coleccion di Arubiana, cu e meta pa salvaguardia nos herencia cultural pa tur generacion.