Skirbi pa Clyde Harms
Siman pasa, Luis Romero Petit, un heroe di mi hubentud a muri na edad di 100 aña. Durante e añanan cu el a hunga pa Cerveceria Caracas (1945 – 1951) tabatin un crecemento enorme di interes den beisbol na Aruba. Na nos cas nos tur tabata sigui beisbol Venezolano na radio y nos tabata fanatico di Cerveceria Caracas. Luis Romero Petit no tabata un gran bate, pero e tabata sin igual na tercera base.
Luis Romero Petit tambe tabata un di heroenan di e Serie Mundial di Baseball Amateur di 1941. Esaki tabata e prome cu Venezuela a gana y di un manera inolvidabel. Perdiendo den di 9 inning contra Cuba, Venezuela a bin bek y gana e ultimo wega pa forsa un wega di play-off. Venezuela a gana esaki dia 22 di october cu score di 3 pa 1. E evento a conmove tur Venezolano hasta cu e dictador Isaias Medina Angarita a decreta e fecha Dia Nacional di Deporte Venezolano. Poco nos por a imagina nos cu apenas 11 aña despues nos mes lo tuma parti den un Serie Mundial di Baseball Amateur na La Habana, pero den “El Cerro”, un stadium hopi mas grandi y apenas 6 aña bieu.
Luis Romero Petit a nace y crece na Maracaibo. Na un edad relativamente hoben Luis a bay biba na Caracas y hungando pa Cerveceria el a bira un Caraqueño di alma, pero el a keda semper cu su cordialidad Maracucho.
Un otro heroe di 1941 a bira hopi conoci aki na Aruba, e segunda base Dalmiro Finol. Pa algun tempo ABBA, Amateur Baseball Bond Aruba, a contrat’e pa coach nos ekipo nacional.
Mi familiaridad cu baseball Venezolano a yuda mi gana punto na Caracas hopi aña despues. Na 1965 mi a bay traha pa Creole y mi a sinta banda di un abogado Venezolano na un bankete cu tabatin pa e empleadonan recien yega. E abogado tabata un fanatico di baseball Venezolano. Ora cu ami, un “foreign staff’ cu a bin di New York a cuminsa papia di e gran serie mundial di 1941 y nombra tur e hungadonan el a keda babuca. Naturalmente mi mester a splik’e cu mi tabata un Arubiano, y el a bira un bon amigo di mi.
Na 2006 Petit y tur e otro hungadonan a wordo eligi pa drenta Salón de la Fama del Beisbol Venezolano. Segun e corantnan di Venezuela, como pelotero, Luis Romero Petit lo wordo recorda pa semper como un gran hungado, pero como persona, mas grandi ainda.